進入黑暗的自由黨

昨日有段新聞令老公公感到失望, 就係田北俊同周梁淑怡重新接管自由黨地區工作, 老公公對此並不感意外, 由佢地上次選舉失敗退任後, 我已覺得遲早有一日會重新回來, 無它, 都係做下show, 而且掌權咁耐, 無可能放得低! 佢地兩個亦唔係放得低的人. 最令我感到失望的是自由黨繼續選擇「兩條腿走路」,亦即既代表商界, 亦想代表基層! 上次選舉失利時, 我已講到該黨失敗, 得票率極低, 主因就係定位不清晰, 沒有立場!

如做生意一樣, 從來打得贏的就是你一開始的定位, 舉例, 做飲食生意, 你必需先定位你是速食型, 還是美食型, 速食型的定位就係平! 美食型的定住就係好食, 貴價貨! 最快執笠的一定係中間既非美食亦非平價貨, 因缺乏清晰立場, 消費者食平野就不會找中間的, 想食好野又唔會搵你, 我心目中的呢類唔掂的中間鋪就有如紅螞蟻, 我睇佢個menu, 成日都覺得佢收你貴價錢賣平價貨俾你食, 我通常也不會光顧這類, 因覺得佢擺明車馬食我個價!

而家自由黨就係處於立場不定的狀態, 我不相信一個商界政黨可以同時兼顧貧富兩邊, 自由黨的定位當然是要貫徹協助商界, 讓大老闆, 小老闆, 財團等見到你對佢地的重要性, 尤其係協助中小企爭取利益及良好營商環境, 這樣才能創造自己的價值, 爭取更多選票, 可是現在的自由黨亦是採取兩頭唔到岸的策略, 想企圖爭取基層聲音, 但我不相信佢地呢班大商人可以真係得到基層意思, 有大排人打正幫助基層的旗號, 社民連, 民建聯, 民主黨, 聯工盟等, 機乎所有黨都係話幫基層, 自由黨甚少提呢方面, 佢諗住人有佢就要有, 可以這會累死自己! 從來獨突稀有才是致勝之道, 自由黨現在放棄自己一路以來的方向理念, 想轉為幫助基層, 老公公不相信這個轉變可以為自由黨係來屆選舉爭取更多選票, 相信自由黨仲有一段漫長的黑暗路要走, 希望佢地盡快醒覺可以做返真正的自己!

美匯升穿81 中原指數88

美元繼續強力反彈, 執筆時歐元亦跌穿1.30! 大家睇下個圖都知而家對美元好關鍵了, 已經係阻力線, 若果可以升穿, 則仲有一段距離會行, 升市莫估頂, 跌市莫估底, 我都唔估了! 且看美元如何發展, 若果今次會升穿埋呢個阻力位, 相信會再去到86-87, 到時我可能會買返D歐元仔渣下先, 不過呢D都係後話, 到時再算.

有成個月無睇中原指數去到幾多, 上星期26號公佈的指數係88.24, 估唔到陰D陰D又上到黎接近90! 看來100點已經指日可待, 不過慢慢升當然更好更健康, 對大家亦無咁傷!

買入華潤微電子

上星期五唔小心禁少左個零買少左微電子, 今日隻野繼續跌, 係更低價買入當然係好啦, 所以今日補返上星期買漏左的股數, 作價0.34係3:56分臨收市前先成交到! 險些又買唔到貨. 今次買貨係動用左之前稀土的本利買入的, 現金所淨不多, 而家微電子已成為持倉量最多的一隻了! 另外, 隻聯塑2128因為俾瑞銀調升目標價, 今日大升16%, 最唔鐘意就係呢D情況, D大行報告一唱好, 就會谷起個股價! 係牛市時就經常有呢種情況發生. 隻嘉華國際此乎今浪已經找到支持點了, 亦守住係上升軌當中, 近日亦慢慢回升. 恆安國際亦重上70蚊樓上. 今日大市升穿返23000點, 不過成交極度不配合, 只係得651億. 繼續有錢就買貨, 無錢就等有錢的做法! 話說陸東近日亦話下年恆指合理值係33000! 若是, 單係指數已經可以較而家有40%-50%回報了! 當歐債危機慢慢過去(歐盟實救D國家), 就係市時焦點再次轉變之時, 美元近排亦非常強勁, 急速反彈, 一日未彈完, 股市一日都未重展反浪!

買樓上車機會?

今日想同大家講下樓市, 政府出招印花稅之後, 成交頓時縮減, 亦有撻訂, 大減價等情況出現, 亦又轉賣為租, 令到租金回報率降低, 不過亦令盤源減少. 老公公覺得今次政府出招非常有效, 因炒家必然要計其成本, 無實力炒家更加要急急放出或止蝕, 調整一段時間相信在所難免, 但老公公認為今次係一個用家買入的好機會, 今次出招實為行政干擾也, 之前已經講過, 現在的環境已經無任何武器可用, 只有政策可以做, 但想一想背後樓市上升因素有沒有改變? 資金仍然泛濫, 利息仍然低企, 導致樓價上升的因素仍然存在並沒有消失, 因此, 這只是一次人為性的打壓, 再者, 部份無實力炒家放盤後, 將令該盤歸入強者, 又或因多了轉賣為租而導致貨源減少, 供應減少樓價必然上升. 過多一兩個月, 當人們習慣此措施的影響, 習慣了調整後的樓價, 購買意慾又會出現, 到時樓價將會重現升浪, 所以今次的調整可能是給予用家一個有得挫價買樓的機會!

突破100大關

今日午市後跌幅擴大, 最後恆指再次收低於23000點樓下, 昨日排隊入微電子但唔成功, 今日再次排隊打算0.35買入, 排左半個幾鐘先有成交, 不過內子發現居然入少左個零又無查返條數, 最後只入得3手......勁慘要俾多次手續費! 之後即刻再落盤排過但排左九個字到收市都入唔到貨...~好慘情~不過今日唔知聽日事, 向好一邊諗, 可能下星期可以仲平D入到貨呢! 呢三日成交縮減得好快, 又咁難入到貨, 會否係已經無咩貨人賣貨呢? 希望下星期入到貨啦. 另外隻嘉華繼續好慘情, 上午都仲升緊, 下午就已經跟住個市跌落黎, 得返2.86

何解今日標題係突破100大關? 皆因老公公憑著多年緩慢的進度, 終於係有記錄之下睇完左100本同投資理財的書, 話說都斷斷續續睇左6-7年, 當中有D係重覆睇左2-3次, 近幾個月都差不多一星期睇一至兩本書, 希望可以keep住每星期至少睇到一本書, 今日心血來潮訂下來年目標, 要將總睇書數量去到150本! 老公公相信書本裏藏著很多前人的經驗同智慧, 而且當不斷吸收, 理解, 分析, 整理等後, 就會越來越清楚自己做緊咩, 同點樣做, 所以都鼓勵大家多多閱讀, 其實我每天都並不是特別抽太多時間睇書, 我都係搭車同等車時睇 (睇壞眼>.<), 不過已經可以做到每星期睇一至兩本書, 所以大家肯就可以了! 圖書館的書呢期都好似買得比較多新書, 希望佢繼續入貨, 我繼續掃貨!

耐性考驗

呢篇係特登寫俾173嘉華國際的, 皆因渣住佢真係覺得要有無比的耐性! 佢的走勢都好一浪浪咁, 上完一浸就經常性地剷返落黎試下個底, 今次跌落黎就破埋一來以黎的一浪高於一浪走勢, 雖然近期打壓樓市措施不斷, 但相信不會影響嘉華太多, 佢賣的都係豪宅, 縱使收緊左豪宅按揭成數, 不過買得豪宅都唔會怕你啦, 市場上大排有錢人, 但幾日來都不斷捱沽, 毫無遇擊之力, 相信係普遍大眾都擔心會影響銷售情況, 不過跌跌下又相信會有d支持, 可能仲係主席呂志和買貨, 佢今年成日買貨, 三蚊樓上都買過, 而家跌穿埋三蚊, 可能佢覺得抵有日心血來潮又掃下貨, 咁就幫左我地托一托個價啦! 呂志和主席, 快快出黎買下貨吧!

隻微電子自從上星期到左0.325之後, 已經又彈返上去, 今日收係0.36了, 老公公行動慢得濟跟唔上節拍, 真係要做下運動了! 不過我都唔太執著係某幾個位了, 費時成日患左老毛病, 為左執低一兩格而錯過上升行情!

南北韓打仗!?

今日收工時, 老婆仔同我講北韓射左D飛彈去南韓! 嘩! 唔係卦, 突然玩D咁既野, 今日成日都唔係中心無得睇市, 但係人屋企下午睇到話跌左五百幾六百點, 原來係有單咁既野, 亞洲地緣政治自然會令到有人沽貨啦, 睇定D, 近期亞洲國家都好多麻煩野, 之前釣魚台件事就搞到日本同中國俄羅斯關係緊張, 而家又輪到南北韓呢個老問題, 雖然係地緣風險提高, 但北韓都應該唔會真係開戰, 只係宣示下主權, 反而可能藉著今次引發的調整, 制造左一個買貨機會! 且看此事發生後, 美元回升, 今日港元亦都轉弱, 資金撤離, 挨近就黎到7.76, 已經有一段時間無係呢個水平, 且看今次的調整仲會到幾耐!

597 華潤微電子 業務比重調整

公司預期下半年表現同上半年持平, 咁即係已經幾可肯定份全年業績靚靚仔仔, 提高節能產品業務當然好啦, 不過微電子打算黎緊2-3年都會研發新產品, 相信資金的輸入都係要持續! 唔知同呢篇野有無關, 今日微電子升超過7%, 由呢期跟隨大市回調低位反彈收返0.355. 另外, 全通已經彈返2.42了! 由低位2.1附近好快上左黎, 都係用左兩三日, 老公公呢幾日覺得自己部置真係有D慢, 係調配資金方面要檢討檢討! 政府出招後, 嘉華呢期都捱沽啦, 而家又跌返落3蚊邊, 佢個走勢都好平穩, 上上落落好有節奏, 暫時都唔郁, 又就黎到出糧日子喇! 又係調整的日子, 要睇下點入貨了!

華潤微電子（５９７）：提高節能產品業務合比至五成

華潤微電子（００５９７）首席執行官鄧茂松對媒體表示，為配合國家政策，公司計劃２至３年內提高節能產品業務，由目前比重３成提升至５成，並重點研發電動汽車電池元件及管理系統，料４至５年後可對業績有所貢獻。
另外，在消化電子產品及節能應用需求帶動下，華潤微電子今年上半年虧轉盈１﹒３億元。
鄧茂松指出，集團由去年第二季度開始，半導體產業已從金融海嘯中恢復，公司去年三個季度已盈利，預料下半年業績表現可與上半年持平，全年有望轉虧為盈。

跌完未?

前日恆指跌到23200附近水平, 昨日爆返上四百幾點, 今日又黎左個V形市, 呢排大上大落, 早個星期先至幾日殺上千幾點, 呢排又用左四日殺返殺千幾點, 每日上落三四百點, 真係刺激過過山車! 呢幾日有一個感受, 就係我轉身得好慢! 無論係沽貨定決定買貨都好慢, 我想這是準備不夠同經驗不足的原因, 正當佢跌咁多之際, 我仲未決定買返邊隻好, 個市昨日彈返上, 張list的幾隻股仔都已經彈左差不多一成, 事後睇返看似錯過了一個撈底位, 不過又估唔到彈得咁快, 另外, 究竟係咪調整完? 定係彈一彈再殺落一浸呢? 呢期真係玩到我的思維都有D混亂! 隻稀土今日已經上返3.7! 雖則我決定左唔會買返佢, 因想買回一些有質素的股, 但將來可能會見到隻稀土繼續上返, 心裏當然不好受, 但我相信呢點係必需接受的事實, 無可能次次俾你買在最低, 沽在最高! 買完就跌, 沽完就升呢種現象, 我相信總會經常見到, 接受吧! 唯一可解決的就係入市同出市策略.

繼續震呀震!

昨日大跌完, 氣都唔抖今日恆指又再跌過四百幾點! 成交過千億, 唔少野喎! 四日之內已經跌左超過千四點, 呢次回調都幾厲害, 睇下我榜上D 股仔, 好多都跌得仲低過係23000點升上黎的時候, 昨日講完微電子硬淨, 今日就跌差唔多5%俾你嘆下! 稀土好彩昨日走左, 今日再跌8%! 連自動化今日都大跌超過8%! 帳面的利潤係呢幾日亦都不斷縮水! 要繼續努力! 向著第一個一千萬進發!

通漲來了!

其實通漲會來就晨早都知, 只不過正越黎越埋身喇, 昨日去食午飯間餐廳都未加價, 今日就已經加了, 食個粉麵加一蚊, 果D常餐加兩蚊, D 飯由31加到34! 加足一成! 勁呀! 上星期買個燒味飯, 以前雙併13蚊, 而家都要15蚊! 不過13蚊有雙併係今時今日真係低左D, 而家都係追返人地個價! 康師傅公佈業績, 毛利率急跌, 利由係原料急漲! 要考慮繼續加價, 老公公擔心輸入惡性通漲將會係香港出現, 無得加息呢招, 香港無法應付, 擔心一起局住俾人打!

沽出中國稀土

中國稀土走勢越來越差, 穿左4蚊收市已經想沽佢, 今朝去到3.7x, 因就黎跌至前一個區間, 所以打算若3.6就點都走貨, 點知下午港股突然急跌三百幾點, 到我發現時已經係跌穿左3.6, 最後係3.52接近全日低位沽出! 之前一直仍為跌到4蚊邊都係震倉, 不過大位已破, 若然最後真係只是震倉回頭大升, 亦無悔了! 皆因呢D股本身基本因素不強, 之前炒作過甚, 獲利回吐者眾, 大跌起上黎唔係人咁品, 檢討返今次的操作, 事後孔明, 應該係之前大升時分批獲利, 鎖定一部份利潤, 咁好似之後咁樣大跌, 都唔會導致帳面利潤大減, 由高位計, 少賺了萬二至萬五! 而且此等炒股應該高位鎖其利潤, 而非自我期望佢會繼續升, 吐利換入其他基本因素更好的股似乎係更好選擇, 不要浪漫機會成本! 呢隻股放左之後, 相信已經不會再次買入了!

倉內另一隻捱價比較勁的係中國全通, 今收於2.11, 走勢亦唔樂觀, 但有良好基本面, 所以仍安心持有. 嘉華國際則仍係佢的上升軌道中運行, 屬正常調整. 華潤微電子近日沽壓並不沈重, 所以無甚影響, 仍守係其上升軌道上. 老公公要開始諗下套現中國稀土所得資金應放於邊隻股到了!

769 中國稀土: 購入價1.8, 賣出價3.52, 持貨6個月扣除手續費後回報94%.

633 中國全通 廣州亞運會安保

繼今年上海世博之後, 全通係廣州亞運會成功獲得運動會安保衛星通信保障的多個項目, 全通係通信安保方面的品牌相信係市場上已經建立一定的地位, 不過今日大市跌四百幾五百幾點, 中國全通需有好消息亦無法避免更跌超過6%, 係倉位下跌最大, 嘉華同稀土都下跌接近5%, 稀土跌到敏感位置4蚊, 連恆安亦跌穿70蚊, 恆安一直都係好強勢, 但近呢一兩個月已經積弱, 一路陰陰跌, 今次仲一口氣穿左70蚊.  今日係倉位下跌幅度最大的一日, 皆因今日係全面下跌, 平時都有拉上補下, 表現都好平穩, 再加上全通早前入貨位較高, 今日的下跌令到該部位有虧損, 而第一注的利潤減少, 所以變相令回報減少乘二! 單日帳面利潤已經蒸發左一萬銀有多! 實在有點兒那個! 但全通價值不止於此, 所以無懼下跌, 而且仍在牛市中, 此次調整不用害怕, 有貨繼續渣, 有錢繼續買.

中國全通廣州亞運會安保保障再獲佳訊

歷次重大活動全在其中

中國全通(控股)有限公司 (「中國全通」或「公司」，股份代號：633 )宣佈，繼圓滿完成上海世博會安保任務之後，公司的衛星系統和產品再次成功獲得本月在廣州舉行的亞洲運動會安保衛星通信保障的多個項目，為此次亞洲的體育盛會安保工作發揮應有的作用。
今年以來，中國全通的衛星系統和產品以及技術維護和服務已經在上海世博會、濟南全運會、廣西中國東盟博覽會、海南博鼇論壇等國家的重大活動中成功運用和推廣。此次公司交付客戶使用的廣東省應急、消防、民防等多個部門的多項系統將參與本屆亞運會應急通信安保任務。
由此，憑藉公司領先的技術優勢和周到細緻的技術維護和服務，中國全通在積極參與並獲得國家重大活動保障項目的同時，更提升了該衛星系統和產品的品牌影響力，同時帶動了該系統和產品在上述領域的推廣。其中，今年有關系統和產品在北京、上海、廣東、江蘇、廣西等省市的消防部門都成功得到運用。

http://www.todayir.com/tc/ownnews_listdetails.php?itemid=45567

嘉華國際 嘉岶薈呎價4萬

嘉華國際係呢一兩年內將是集團售樓高峰期, 跑馬地嘉岶薈亦快將開售, 之前都吹話3萬呎價, 但董事陳玉成昨日就話計劃以4萬一呎賣盤, 原因就係QE2資金流入港市追捧豪宅, 仲打算保留三至五成作收租, 呎粗逾70蚊. 而上海慧芝湖三期亦已獲預售樓花, 會有150個單位, 期待嘉華快些賣盤賺到笑哈哈!

近日呂志和亦繼續係市場買貨, 今年一共增持7次, 最新果次買貨高於三蚊照買, 而且除主席, 見到亦有其他集團入貨, 若非看好, 為何主席仍要繼續不斷買貨? 此乃向大家示好作用, 邀請大家一齊入黎玩呢場遊戲. 摩通幫嘉華計過數, 每股資產淨值達8.57. 而家仲大折讓. 詳情可睇以下兩篇文章.

http://paper.wenweipo.com/2010/11/11/ME1011110003.htm
http://paper.wenweipo.com/2010/11/11/TZ1011110002.htm

贏的標準

對老公公黎講, 投資理財好比一場遊戲, 不過我對呢場遊戲玩得好認真, 既然要玩就要贏, 那麼究竟贏的標準是甚麼呢? 以往是期望係工作年齡年賺夠足夠退休後的生活費, 假若25歲開始工作, 60歲退休, 然後活到90歲, 則是用35年的工作時間去賺65年的生活費! 因為你期間都要洗費, 所以我係計哂25至90呢段時間, 一個普通仔要玩呢場遊戲好難, 因為若無任何投資, 你要用接近1年去賺2年錢, 試問怎樣可以做到. 現在我不再用呢種思維模式了! 因為領悟到其實不需要這樣做, 只要計算到將來退休後需要多少生活費, 亦即需要多少被動收入, 然後向著這個目標進發, 這樣的話甚至不需要60歲已可退休了! 用我以前的想像很難玩這遊戲的, 因為長遠幾十年, 你會經歷很多風浪, 萬一到最後一個泡沫你先失手, 隨時白費了你一生的努力成果! 每個人贏的標準都不同, 而我的標準就是建立每月被動現金流四萬! 唔算多, 但已經足夠讓老公公退休兼有錢買下股票仔了!

財務自由的重要

剛剛的星期日聽朋友講佢公司近來發生的人事變動及改革, 聽後更覺盡早規劃, 達到財務自由的重要性, 亦慶幸自己係年輕之時已經有所領悟可及早準備. 事緣友人公司打算進行改革, 有可能將admin team廢除, 因此將有多位員工將會被革, 友人講到果度幾位同事都係四十幾歲, 仔女又未大, 係度做左廿幾年, 而家話炒就炒好無人情味, 友人替佢地好唔值得, 老公公聽後沒有多說話, 皆因呢個就係現實, 係每個打工仔都有可能面對的問題, 友人講話佢地咁大年紀, 係度做左咁耐, 出去都唔知搵咩工, 都好難搵到工做!

其實呢點就係富爸爸所強調要有財務自由的重要性, 如果你可以建立自己的被動收入, 令到每月被動收入多於開支, 那麼就算你沒有工資收入, 你也無需擔心, 因為你已經為自己建立一個安全網了! 我聽完件事後第一個反應就係, 你返左工廿幾年, 無理由儲唔到錢, 理論上已經有足夠的時間建立安全網, 但現實係好多人都做不到! 為何呢? 我相信係普遍人皆缺乏財務智商, 沒有這方面知識, 這是學校沒有教, 父母亦未必懂得, 因此導致大部份人也不曾考慮個人理財問題, 只係認為返工儲錢, 每月儲多D 希望到老可以過活, 又或生幾個仔女將來養返自己, 試問有多少人是真正計算過退休後生活需要多少錢, 若果佢曾經計過, 就應該知道單憑你份糧 (我指普通打工仔) 根本無可能做到! 缺乏財商的人雖然聽過通漲, 但卻不知通漲的真正可怕之處, 只要計一計你將來要洗幾多錢, 再加上通漲, 你睇完條數包你嚇一跳! 老公公係3年前第一次計呢條數, 條數大到得人驚! 不過呢幾年累積的智慧已增多, 已經令我覺得達標不是難事, 只是時間關係! 若然我們係工作上同時建立個人的安全網, 那麼, 你將不會對自己如何生活感到擔憂! 所以各位朋友, 記得係繁忙的生活中都要考慮一下自己的將來呀!

大家樂讓步 職工勝仗?

最低工資立法, 原本大家樂打算提高工資後, 會更改僱員合約將食飯時間豁免於薪金中, 變相即減薪, 若認識老公公都知道我其實反對訂立最低工資的, 薪金應有市場決定變化而非立法控制, 若然你人工低, 可能係你缺乏競爭力, 自能從事低收入工作, 你想擺脫呢個困境就應該發奮靠自己改變呢個現實, 你入職時已知人工, 亦即你接受你係值呢個價, 若然你覺得自己唔值呢個價, 你就唔會做而係搵另一份工, 久而久之你自然知道自己係值咩價! 所以你想加人工, 應該要問自己憑咩可以叫老闆加薪俾你! 又若然你不自我進步, 讓自己升下level, 咁唔可以怪人地唔加你人工, 唔可以怪社會不公平! 上述係老公公一向的睇法. 所以我返工有份人工已滿足, 不會強求希望年年加薪, 老闆加俾我, 我會感恩, 當係bonus, 但唔加俾我, 我覺得係老闆無錯, 因為我自問都無咩原因/進步係值得老闆加我人工, 除非你覺得自己唔值呢個價, 先走去同老闆傾啦!

早幾日睇新聞李卓人話大家樂呢次除消改制係佢地的勝利, 仲話若將來有其他集團想同樣咁做, 佢地會以相同手法抗爭! 聽完之後老公公覺得好好笑! 我覺得呢次並非佢地的勝仗, 而係對所有低下階層員工響起警號! 其實有今次呢個局面, 係決定立法之時, 就已經可以預見! 最低工資立法根本上只會令缺乏競爭力的人更難搵工! 你想老闆加你人工, 但老闆仲識計過你, 見招拆招, 員工無可能打得低老闆, 除非你做野個集團係有好龐大的工會兼會影響日常運作, 好似空姐, 公務人員, 地鐵等等, 只有你身處呢D 類型行業的工會, 你先有足夠強的bargaining power, 否則, 好似一間餐廳仔, 酒樓仔等, 你根本無say! 所以我覺得定立最低工資受影響最深的會反轉頭係低下層員工! 試想將來也訂立最高工時, 我睇佢地仲可以每月搵幾多錢!

QE2後恆指再升 美匯下跌

量寬推出後第二日, 股市繼續向上, 恆指昨日升接近400點, 上到24535, 突破左23800呢個阻力之後一路上! 莫非之前只穿過一次23000的調整已經完結? 只係幾日就上左1500點, 值得留意的係恆指月線圖上遺留左一個裂口! 係22600果度有一個200-300點既裂口, 當日調整跌到去22900左右就彈, 並未回補呢個裂口, 係月線圖上出現裂口實屬罕見, 會否代表此為突破性裂口? 美匯亦下跌至近期低位, 澳元穿一算, 1.01水平, 而家去澳洲仲貴過去美國! 歐元上到1.42, 港匯亦超強去到7.7510樓下, 不過美元尚未算完全突破, 只係到達一個好大的壓力區, 所以大家宜要小心仍有可能突然的調整. 今次調整同上次我萬九點等調到萬七再買的感覺有D似, 最後只係跌到萬八就上了! 果次之後就無買了, 但今次見唔到位兼上返就追了, 過左兩日暫時事後孔明睇仲係正確, 不過呢D似係運氣多D! 都係快快搵到適合自己買賣方法仲好

633 中國全通 又中標

呢排隻中國全通唔知做咩喎! 中完一單又到一單! 今日又公佈業務突破, 係佢的呼叫中心, 此業務其實佔佢全年營業額好低, 得1-2%, 都唔知有咩好恭喜, 但睇落原來今次合作的公司係中移動喎! 雖然呢項業務賺錢唔多, 但得到中移動兩個省的中標, 我相信係代表對全通服務的認同及質量的保證! 今次全通選擇公佈呢單野, 我諗都係因為佢的客戶係中移動的關係!

中國全通呼叫中心外包服務業務別樹一幟再獲新突破

中國綜合資訊通訊應用解決方案及應用服務的供應商 ─ 中國全通(控股)有限公司 (「中國全通」，股份代號：633 ) 今日宣佈其呼叫中心外包服務再次成功在中國移動廣西公司全省的呼叫中心綜合資訊平台外包服務（12580）中標。該項目是繼今年八月公司在中國移動河北公司客服中心外包服務（10086）中標之後，在呼叫中心外包服務業務的又一新突破。迄今，中國全通為河北移動、廣西移動兩個省的七千多萬移動用戶提供呼叫中心外包服務。


近年來，更多國內大型企事業單位將非核心業務如客服中心等採用外包方式交給專業公司承擔，以減少其運營管理成本。呼叫中心外包服務已漸為趨勢，發展前景廣闊。該等外包服務業務的客戶多為國內大型企事業單位，在選擇外包公司時都有嚴格的標準，包括對外包公司的人員素質、服務品質、運營管理經驗以及公司實力等的要求甚高。而中國全通憑藉運營管理、人力資源、服務成本、應用系統設計與研發和技術維護的五大外包服務優勢，一直受到客戶的好評與嘉獎。

升穿24000!

今晚美國聯儲局會議息完, 今日恆指升穿24000點仲收埋市! 23800都破埋, 老公公見手上的股份全通同埋微電子都處於就黎爆破階段, 為免夜長夢多, 而且昨晚亦檢討過自己的投資策略, 決定今日動用手上儲備, 買入全通同微電子, 老公公唔再執著於果一兩格! 雖然入市位決定將來回報率, 但老公公經常為左果一兩格而大失良機, 一而再咁犯同樣錯誤, 所以老公公決定要改變影響我買賣情緒最大的呢個難關, 唔再拘泥果幾格位! 入市價一定唔係最靚, 但起碼係有價值的情況下有貨在手最重要, 老公公都覺得自己好笨, 等左成個月調整, 由22000到24000, 但隻全通已經由1.8扯到上黎2.4, 若然我等調整先買, 都唔可以再係1.8呢D 水平入貨, 所以我之前等調整係浪費左機會成本, 放棄左原本可以入好價的位, 無人有水晶球在手, 亦唔會知幾時有調整, 亦唔知調整之前你隻股仲會升幾多先! 既然如此, 老公公決定唔再捉摸短線上落了, 要改變遊戲玩法, 若有錢, 而隻股仲有價值, 就買入, 唔作無謂猜想! 可能呢個方法係最好解決我的問題! 老公公仍在摸索最適合自己的投資方法! 相信會越來越好, 越來越有進步!

由於剛入貨又係月頭, 所以再一次更新下個組合比例變動先:
現金: 1%
173 嘉華: 28%
769 稀土: 12%
633 全通: 31%
597 微電子: 28%
老公公手上而幾近無哂資金了, 不過其實我仲有一注的! 就係一手匯豐! 我無將佢列入呢個組合, 費時佢阻住地球轉, 哈哈! 若然調整真係今晚議息後就開始, 呢一注將會係我係調整市用黎換馬的唯一資金! 目標仍然係增持全通及微電子. 基於帳戶管理方便, 入微電子機會率較大.

選股法則 祖魯法則

之前寫過一篇文講關於老公公的選股法則, 今日再同大家簡單分享一下另一個檢視股票之道, 係參考自一本書散戶心法祖魯法則:
強制性標準:
1) 過去五年, 至少有四年每股盈餘成長率相當高
2) 低本益成長比, 即PEG (不高於0.75, 最好低於0.66)
3) 董事長聲明樂觀
4) 強勁流動性、低債務、現金流量高
5) 有重大競爭優勢
重要標準:
6) 有轉機或有題材 (8分)
7) 總市值小 (7分)
8) 股票相對強度高 (6分)
期望標率:
9) 股利率不低 (5分)
10) 合理的資產部位 (5分)
11) 經營階層持股高 (5分)

強制性標準當然係必要的, 而重要及期望標率並非必要條件, 有就最好, 無的話也可, 後面的括號係代表若十分滿分, 呢一項的重要性如何. 祖魯法則同之前提及的選股法則有相輔相承之效, 尤其第二點關於PEG, 更是價值投資者買入時需要留意的, 買入PEG低於1而又有價值的股票, 係穩賺的投資, 至於可以賺幾多, 就睇PEG有幾低了!

投資組合比例

不經不覺已經踏入十一月了! 第二季決定要真正的踏入股場, 逼自己買股, 到而家為止仍覺得自己係入市方面存在心理問題, 但比起以前已稍微改善了, 盼望持續的參與能夠讓我盡快適應這種感覺吧! 這樣才能改善我的投資績效.

剛剛的星期六日整理一下自己的資料, 順便趁今日月頭, 就分享下老公公的組合比例, 因為每月都會有儲蓄, 所以將來不再以金額匯報了, 因不能反映持倉比例, 用百份比都係好D:
173 嘉華: 28%
769 稀土: 12%
633 全通: 18%
597 微電子: 22%
現金: 20%

其實老公公近排係好想減持嘉華173! 因考慮其未來數年的增長持續性較弱, 佢只係呢一兩年進入收成期, 但缺乏往後的持續性, 不過售樓在即, 老公公仍願意俾一年時間佢發揮力量! 稀土769當日買入也是因為預計其行業將脫進低潮, 係列為轉機股性質, 只會繼續渣住, 其概念尚未炒完, 已經調整了差不多足足一個月了! 全通633及微電子597係老公公想繼續增持的股票, 全通近日有多項利好的消息, 相信未來數年增長持續, 而且現價仍有價值, 係非常好吸納的股票, 但已經比起買入時炒起左一轉, 老公公是在等待著其深一點的調整, 等到頸都長... 微電子也是價值被低估的股票, 加上其有實質業績支持, 現價買入絕對吸引, 也是等待跟隨恆指調整時買入, 惟成本控制因素較為影響微電子將來表現, 全通係較為穩健而又有增長的投資, 呢幾日已經好有忍唔住好想入市的感覺了! 眼見今日全通朝早爆升, 同埋微電子高收都感到難過! 寄望恆指盡快回調吧! 今日恆指大升五百幾點, 好似好暢旺咁, 隻隻股都升, 連老公公都感覺上好似上星期五已經調整完, 但23000點只係穿左一次, 無理由咁樣就叫調整完! 希望會快些有調整, 好等我有機會快快買貨吧!

中國全通最新發展

昨晚集團公佈消息, 詳情如下:

中國綜合資訊通訊應用解決方案及應用服務的供應商 ─ 中國全通(控股)有限公司 (「中國全通」或「公司」，股份代號：633 ) 今日欣然宣佈其研發的動中通衛星移動通信系統，以其先進和實用性相結合、高速與穩定性相結合、動態與靜態相結合的三大優勢，在安徽、廣東、陝西等國內多個省民防部門簽訂了系統供應合同，以及技術維護服務合同。
該系統產品是公司針對政府及公共安全等職能部門在處置突發事件、反恐維穩、搶險救災、實現即時視頻指揮調度、提高應急聯動和快速反應能力的需求而推出的功能強大的應急移動衛星指揮平臺。

該系統產品在今年四月獲得了國家民防部門的規範許可。為公司在全國民防系統的業務推廣奠定了重要基礎。國家民防系統在全國省、市、縣都設有分支機搆，其在衛星移動通信系統有巨大的發展前景。
中國全通行政總裁兼執行董事蕭國強先生表示：「衛星通信業務是公司的核心業務之一。今年以來，動中通衛星移動通信系統產品在國內公安、交警、消防、無線電管理等部門取得了多項系統供應合同，而且在醫療急救、海洋監管、高速鐵路、水務管理等公共事業部門得到了很好的推廣。其業務應用領域，已經從災害應急通信領域推向社會公共事業服務領域；其市場推廣範圍，已經從沿海中心城市向全國各省份邁進。並隨著該系統的廣泛應用，通信及技術維護服務業務不斷增加，為公司帶來長期、穩定的業務收入來源。」

呢篇野有幾個重點, 其一重點係今年四月得到民防部規範許可, 即可向國內各省同類型部門進行產品推銷, 呢點係集團之前一直講的橫向發, 集團無選擇縱向發展, 建構自己的衛星, 而選擇橫向發展就係因為現時只是很少省份有業務, 倘若打穩陣腳再向外推廣, 其品牌效應將可帶來龐大生意額, 文中亦講到已經開始從沿海城市各國省份邁進了! 第二重點係業務亦已從災害處理推向公共事務領域, 之前公司係年報亦有提及發展其他業務, 惟相信仍在相當起步階段, 對業務利潤未起太大作用, 但係將來亦可望成為集團亮點, 且看集團如何找到自己的市場定位及強項. 第三係技術維護服務不斷加增, 可帶來穩定長期收入, 這即是保養費! 係自動化同全通所擁有的強項, 簡單而言, 你每月交煤氣費, 其實當中係包括保養維修費, 你唔用都要交! 當業務越來越多, 保養費就收得越多, 而且因為轉換成本高, 若將來要升級又可收錢, 此乃一確保公司有穩定現金收入的來源. 睇完呢篇文後, 相信全通已幾可肯定進入高增長期了! 每年25-30%增長我看是確實會達到的!

另外, 本星期聯儲局議息, 要決一勝負了, 入市時機非常難掌握, 雖注意今朝港匯超強, 7.7530! 有大量資金湧入香港, 當然係黎買貨啦! 不過未知係湧入黎即刻買貨, 定係先再質低你, 然後掃貨, 不過點都好, 老公公要提醒自己, 今次最重要係買到貨! 即使不能最低價買, 但只要仲有價值就應該勇敢買入!