置業投資新手入門-準業主完全置業聖經

呢兩三日剛睇完呢本書，又學到d新野，我一向都覺得要認識樓市既知識比股市難，好似無咩書或者資訊可以令我認識更多，可能是我未好認真去研究呢個市場，係圖書館見到呢本書，於是當然係借返黎看看啦，都學到d野，都係我之前不知的， 等我同大家分享一下。

申請按揭款時需留意:
1) 銀行批核每月供款額，一般都唔會超過按揭申請人每月總收入的45%
2) 按揭還款年期加埋物業樓齡，一般都唔會超過40年。例: 你層樓樓齡25年，咁你還款年期最長15年
3) 還款年期加埋申請者年齡，一般不會超過65年。例:你今年50歲，咁最長還款期唔會超過15年

仲有就係終於知道咩係摸貨，就係係簽訂成交合約或協議後，又未成交或上會做按揭之前，係呢段時間將層樓再賣俾第二個，咁樣可以節省成本開支。

第十三週 市場等待美元救市方向

eur 日線圖

eur 8小時圖

eur 1 小時圖

美元係星期一急衝上1.48樓上，我星期一入市~沒有預計到歐元如此大升~個人期望係沿著均線作上落市，但市場一次過將價格拉回較中性位置，之後整週就係1.48-1.46位置漂浮，整週係典形上落格局整固，老公公於1.4630沽了eur 一手，沒有設下止蝕位，仍然相信美元繼續向下嘗試，所以不止蝕，費時被惡性損害，亦不在更高位沽貨，因不想將風險提高，最後上週收市1.4610，可以話係打和。美國政府話係黎緊星期一亞洲開市之前會公佈7000億救市方向，市場係整週好明顯地係等待救市方向，缺乏方向可言，且看星期一開市如何，若於星期一開市前公佈，則有好大機會出現gap開市，暫時止賺位set於1.4450，但有機會可能將此位再set落d，又或者先行獲利再等待機會入市。

日線圖，ADX已經跌至28水平，快要進入range區域，確信美元將進入另一個range，只係繼續測試上下底在哪裏，因此向下挑戰1.40機會仍然好大，之後將採取低買高沽策略。下一週估計美元上升機會仍大。

匯豐發展村鎮銀行

匯豐力拓內地村鎮銀行，歷史悠久可予客戶信心，冀以經驗達零拖欠

《經濟通通訊社２５日專訊》據《東方日報 》報道，匯豐銀行 執行董事王冬勝表示，集團第三家村鎮銀行將於下月在東部福建永安降落，註冊資本為４０００萬元（人民幣．下同），不排除視乎營業額增資；而北京 密雲縣村鎮銀行的申請亦已經獲批，將於年底掛牌成立。
王氏表示，村鎮銀行暫以存貸業務為主，並一反匯豐中國放貸快於吸存款的情況，指出現時貸存比率已符合中銀監規定，低於要求的７５％。他解釋謂，匯豐目前暫以吸存款為主，以集團１４０多年歷史，可吸予客戶更多的信心。
另一方面，王氏指出匯豐可借鑑印度 及墨西哥等地的經驗，貸款前會先留意客戶資金流、還款能力及業務發展前景。所以集團至今在內地村鎮銀行仍然「零壞帳」以及「零拖欠」。

匯豐繼續係中國村鎮發威!
另外，呢排中國水務係咁係1.3以上附近不斷買貨，今年累計已經買左佔發行股份0.8%以上。

中國自動化 569

2008年7月22日 - 里昂料中國自動化未來兩年純利增長強勁 里昂發表報告, 指中國自動化(569)為國內工業安全控制系統供應商的龍頭, 可受惠石化及鐵路行業的投資額增加, 而最近中國自動化增持從事內地鐵路訊號及通信技術與開發業務的北京交大微聯共11.04%股權, 對盈利起正面作用, 料中國自動化未來兩年的盈利年複合增長率可逾30%。

里昂表示, 工業安全控制系統迅速成為煉油/乙烯廠及鐵路營運商的必備設施。 而中國自動化有強勁的客源, 主要客戶包括中石油(857)、中石化(386)、中海油(883)、神華能源(1088)、馬鞍山鋼鐵(323)、港鐵 (66)及中國南車股份。 根據市場研究公司Frost & Sullivan的預測, 內地的工業安全控制系統市場07年至2011年的收入年複合增長率可達39%, 主要受惠下游的鐵路及石化工業的大額資本開支。里昂料中國自動化可持續有強勁的盈利增長, 08年至2010年的盈利年複合可逾30%。

里昂又指出, 中國自動化08年的預期市盈率為11倍, 較環球同業折讓33%。該行預料中國自動化08年及09年的純利分別為1.71億元人民幣及2.21億元人民幣, 預期市盈率分別為11倍及8倍。
_________________________________________________________________

今日又search下自動化有咩消息，搵到呢份7月中的報導，可以睇到自動化背後的集團均係中國大企業，安全方面既野當然又搵返中國最大間既安全系統公司啦! 睇一睇呢d大公司有幾多地方需要安裝同埋每年保養費，以及將來佢地會繼續開發的業務，若然你看好以上企業，咁支持住佢地背後有良好運作，而令佢地唔會爆炸，唔會出軌的自動化，當然就佔了重要的席位。如果自動化較同業折讓33%，咁計返轉頭，係咪即係如果與同業看齊，應該係PE16倍? 不過無論如何，黎緊呢3年自動化既營利增長都仍然好可觀，熊二及熊三將帶來一次好的入貨點。不過熊市咁多貨揀，我都仲未諗定究竟入邊隻好! 真係好頭痛!!!

蒙牛啟發了我入市時機

毒奶事件後，蒙牛停牌四日，今日復牌後股價急跌六成，停牌前20蚊，一日內股價跌低過8蚊! 遭洗倉活動狂沽，某大行最低評級更只係3.8。多個國家宣佈禁止中國奶類入口，星巴克轉用維他奶製品，可謂今次既贏家，股價升至11年新高。蒙牛因今次貨品回收，所有存貨報廢，就算沒影響的奶製品也已經被零售商收起，即係有無事既奶都全部蝕哂錢! 真係一Q清袋是也，至少今年第四季，蒙牛應該係全無生意可言，今年業績肯定非常之差，因可以話全年只有頭三季生意，就算有奧運果時既幫忙，亦無助黎緊半年至一年的生意。不過蒙牛乃國內佔有率高的公司，經過呢一役之後，再加以整頓，能否令投資者重獲信心，就好似可口可樂一樣，以前也曾經試過有可樂受污染要回收，但最後每一次也能渡過，而且營業額依然不變，今次蒙牛的遭遇，反而係令佢地學懂一課，需要加強監控，其實這也是所有中國製品要留意的地方，過往中國人實在太看低質素，以為唔會有事，成日整假野，總有一日呢d人全部都要受到制裁! 若你有信心蒙牛可以好似可口可樂一樣將來能新振作，那麼，今次毒奶事件再加上遇上的大股災，相信一定能給你一個非常之好的入貨位作長線部處。

今日同爸講起蒙牛事件，我也將上述觀念同佢交流，老公公爸爸以前做過地產生意，佢同我講左一個觀點。佢話用返佢係地產以前既知識，樓價下跌，有好多不明朗因素，大家唔知會唔會再跌，佢話呢d情況唔應該買，可能今日由20跌到8蚊，你話佢抵，但聽日可能繼續跌到6蚊，4蚊，2 蚊，你唔會知道幾時係底，佢同我講，以前佢地買樓都係一樣，要直至股價係低位升返一兩蚊之後你先可以開始買，情願比低位付出高少少溢價，因為你永遠唔知跌到要多! 佢呢種諗法意思係相對係一個比較安全既地方買入，雖然唔係低位，但你望返將來升幅亦很可觀，溢價係用黎買你安全。 想不到佢老人家會說出此等道理! 剎時令我想起老曹經常講的寧買當頭起也是這樣，等到股價係低位升返10-20%先至開始買，咁樣就係寧買當頭起。亦令我想起老曹當年1974年股災一役，佢不斷買和記(係咪和記?定係和黃?唔記得邊間!!!)，跌到10蚊買以為好抵，點知...98765432，直至買到1蚊先無再跌!!! 經佢咁樣講之後，我對於何時入市買二三線股也有了不同的睇法，雖然可能會錯過最低位買入，但你也不會知道幾時係低位，可能你買完佢再跌，就好似IT一樣，跌低過1蚊我覺得係好抵，但你唔會知佢跌到幾時，假若佢好不幸去到0.5，你係一蚊買入就變相損失了一半實力係0.5買入，由呢個角度諗，那些二三線股，我也想等待至熊三時才入手。這樣也好比損失了購買力，不竟老公公的資金有限，每一注也要非常之小心使用。

中國自動化 569

中國自動化半年營業額接近408.8 百萬元，較去年同期升132.%。若對比去年全年業績，你便可發現自動化單是今年上半年業績就已經超過了去年既全業營業額403.4百萬元，好明顯地，若然就算佢下半年一單生意都唔做，佢仍然係有營利增長，亦可以係話，佢今年營利會有大增長，而細看分部營業額分析，可看到有一大部份營利貢獻來於收購的北京交大微聯RIS業務，佔96.6百萬元，此收購對自動化營利帶來很大貢獻，自動化本身自有25.2百萬元RIS營利，收購北京交大之後，亦可增加自動化係市場既佔有率，對其未來發展鐵路工程起了很大的作用，而且北京交大的RIS毛利率只有30.2%，遠遠低於自動化本身的41.6%，管理層若能提高北京交大的毛利率，相信能帶來更大的營利貢獻，自動化係RIS的業務可進一步睇好，尤其中國鐵路及地鐵仍在處於增長階段，對於有市場壟斷地位的自動化，有非常好的增長動力，再加上此等涉及安全問題的工程，外國市場比較難滲入市場，自動化仍擁有很好的市場地位。

唯一要留意的地方是自動化的稅率，以往自動化處於自稅期，但今年開始需要交稅，今年過後的稅率才可示為其真實稅率，而六收購北京交大的稅率為25%，需要等其「高新技術企業」身份獲批後才可減為15%率稅。且等待年終業績就可看到其實際表現了。

若能維持上半年度動力，自動化全年有機會係營業額接近上升100%。全年每股盈利相信很大機會是0.17以上，去年為0.1412，以此幅度計算，年增長為20.4%。需留意今年全年股份發行量比上年度增加，計算每股盈利時要多加留意。近日股市較為波動，最近創新低為1.3，現價1.73，若而PE 10計算，現價已是合理水平，但現時處於熊市階段，且自動化交投量較低，往往十幾廿幾交易已可影響其表現，因此在未來可見日子，相信以更低價錢吸納機會尚在，投資者不必心急入貨。自動化早前亦有一個大的裂口低開，此裂口也是一個明顯下破下降三角形。相信是次大型反彈浪亦會回彈此裂口後就會繼續下跌，呢個回調是必須的。需要等是次反彈浪完結後才可看於何時可開始吸納，相信其支持位1.3為重要預示指標。出左中年業績之後，我會以未來每股盈利計算，而非去年P/S計算，因會出現過渡悲觀情況，haha!!! 用舊既黎計會去得太盡，唔知買唔買到。用預估每股盈利0.17計，PE 6倍為$1.02，8倍為$1.36，10倍為$1.7。PE 6-8倍係超值值得吸納的價位，若跌破$1(咁嚴重!?)，就係可以越跌越買的時候了! 此股持貨等待到下次牛市，應可獲利甚豐。但有一樣野我經常都擔心，就是好公司不一定是好股票！皆因要佢升都要有人睇中佢先得！如果唔係有排都升佢唔起。自動化發行量不是太多，若有人睇中佢，可能會升得好快是也！

第十二週 美元回調

eur daily

eur 8hr

美元今個星期回調了，從日線圖可看到ADX跌低過40，升市力度減弱，估計將會好快進入range，開始進入高沽低渣時候，我會繼續等待，係適當時候出擊，近日環球金融很波動，匯金油每日也有很大的波覆。係8小時圖我用左兩個高位畫了一條個通道，這只是用來估計位置的，我相信將會係黎緊數月美元會係長方形框架運行多些，而市場將會係黎緊數週測試呢個range既上下底在哪兒。

英美限制沽空股份

今日港股升1695點! 重上19000以上收市。

美國之前限制沽空所有股份，而家限制沽空所有金融股份直至10月2日。英國則同時限制沽空金融股直至明年1月16日，30日後檢討。918既deep v 反彈，同今日高位收市，原因係中央出手托市，全港央行一齊注資。昨日買不到匯豐，今日佢已經升到123了! 昨日106買不到當然有些可惜，但我整理了思緒，不怕再無機會，只會耐心等待下一次機會，而且有時間俾我儲多些彈藥，呢一次只相信係一個熊二中的反彈，我相信有更多人會被呢次反彈吸引而入市追貨，好戲還在後頭! 但下一次買點我相信可能要半年後了，但我很樂意等待這段時間，相信呢一場海潚仲未過去，而且仲可能有更勁的在等待著。

美國政府連日注資咁多錢，究竟還可以動用幾多錢? 唔通還不斷發債，印銀紙? 可能最終都要咁做，但這就很影響到往後美元既日子了。假若市場發現政府無論注資幾多錢都仍然繼續有大獲野爆出黎，市場信心會變得如何? 假若沽空限制除消後，繼續有大量人儲力沽空，股市又會變得如何? 一次反彈，造就另一次高位沽空既機會，造就另一次更深既跌市。繼次按之後，信用咭會唔會爆? alt-A 呢個比次按更大既炸彈又如何? 我相信今次政府救市只係一個短暫效應，只是減慢速度。熊市只今一年也未到，半年後才有好戲看!!! 各位投資者，呢段時間繼續儲多d 強藥，保留實力將來買好股啦!!!

越來越多資產吸引的股票出現

老公公觀察名單中的多隻股票已經跌近值得購買的水平! 不過有d仍未有太多時間睇佢份report，其中999 IT 已經穿左一蚊，股價已經低過每股帳面值，穿左一蚊之後就創上市新低，皆因樓下無支持位，所以唔會知佢跌到幾多，P/E已經係5.94，佢早幾日出左第一季銷售數字(好似係3-5月)，我印象中仍有廿幾%增長(未得閒睇)，呢段時間股市仲係20000點樓上浮動，呢年消費者受股樓市影響，可能會影響到消費股既營利，但之前我曾略提過，IT做香港加中國生意，不是美國，所以影響可能無咁深同廣，仍然繼續觀察，此股已開始吸引，若你持有數年。

另一隻開始跌至吸引水平係中國自動化 569，呢隻野係同業中既超級龍頭！差不多成個行業都係佢玩哂，有興趣的朋友可以睇返我之前對佢既分析，係度不再多講了，佢終於跌到P/E 個位數了! 佢之前企左係兩蚊樓上好耐，因為佢上市時發行股數不多，所以成交量一向唔多，我見佢有時一日得果十幾手成交，呢d市真係唔係好夠膽買佢，因為十幾手成交已可影響其股價，但我對佢既未來業務充滿信心，因為呢行係高門檻，佢市佔率高，不過佢生意都仲未過10億，總覺得佢做的生意很細，haha! 呢隻股可以等佢繼續跌，我相信呢一隻係下一次牛市表現會很亮麗(係咪只係個人意願呢???haha)，重覆一次，呢隻係壟斷型事業，議價能力高，高門檻，盈利收入穩定的公司，每年公司都要俾maintenance fee俾佢，性質如保險公司。

恆安國際1044，呢隻剛公佈中期業績，非常好！可惜我也是沒時間為大家介紹佢，也要是有時間才為大家講解，但呢間公司也是很值得持有的。

勤+緣 2366，對呢隻股票未作分析，但看到佢近年的業績表現，令我覺得佢有一翻作為，而且高層仲為公司設定左一個好好的相標，令我對佢有頗好的印象，就是在5年內令公司成為藍籌股！能說得出來，我相信一定係很有衝勁，有魄力，遲d睇完佢份report之後再同大家分享。

中國水務855，睇左佢咁多年，反而我覺得呢一隻係最唔值得持有，哈哈~唔係話佢唔掂，但係佢真係唔係太有驚喜囉! 而且現股價仍然頗高(我不是以yahoo的每股盈利計算)，所以，仍然觀察，不過我暫時都頗為深信呢一隻將不會係呢次熊市的收集對象，原因就係機會成本了! 有機會就跟大家講呢樣野。

中人壽係我想吸納既對象之一，基本上除左匯豐係首位我想買入之外，我仲係度諗緊次選係邊一隻，確實令我R爆頭! 因我認為這涉及了機會成本，看來也要跟大家講一講機會成本了! 不過無論如何，都要下次再同大家講了，因為老公公老了，夠鐘訓覺!

港股急插!!! 16300!!! halo!!!

今日港股上演左一幕非常精彩的好戲~呢一個星期，我看新聞看得很興奮，不知怎的，可能是我有幸見證到一次歷史性的金融大災難，確實係難得的一次機會，經過今次之後，我相信對於我將來面對股市升跌會是一個非常好的學習機會! 感謝天父!

今日最可惜既係我要出外上班，不能在早上留係公司，睇唔到佢既發展，我呢排都同老婆仔講要一齊買匯豐，靜待時機，早上時佢sms我，問我112買唔買，我話唔買，要係110樓下先會買，之後繼續做野，到食飯時，佢再sms我話，107，我問佢恆指幾多點，佢話17120。我果時心諗，匯豐跌至吸引水平，但恆指仍未穿17000，我心裏的目標是當恆指跌穿17000，而匯豐又係110樓下就買。那時已經收左午市，食完之後我趕快回公司睇電腦，發現...嘩! 港股中午跌左1300點!!! 我心諗，開市就要買匯豐了，同老婆仔相討之後，我地決定係106 set盤買匯豐，當時最低為106.4，點知...一開市就係咁扯升返，那時兩點幾，我心諗，看來有好多人已經發現16300低位係掃貨點了! 最後仲曾經倒升，收市微跌4點，我同我身邊既同事說了幾次，16300呢個位真係可遇不可求，之後就知點解，原來係金管局注資，兼且各國央行公佈注資，如果唔係佢地注資，我相信呢一個恐慌性拋售可以好勁，我同老婆仔講，早幾日跌1053點唔係恐慌性，呢個先至係，所以要買貨了，不過106蚊既匯豐當然無我地份，老婆仔問我點算，我話唔好set高個價，我情願再等待下一次機會，雖然我唔知下一次機會係幾時或者有無，或者我可能已經錯過了一次，但我係匯市學到的功課時，機會有大把，但千祈唔好見價升就追!

若然匯豐係黎緊呢段時間再唔跌返落105呢個水平，咁從圖表上，匯豐就由一個敏感三角形轉化成下降三角形，係呢個市況，我唔太相信佢可以破到下降三角形的頂部，最多只是擴下呢個三角形的波覆度，因此，我會樂意等待佢跌穿此三角形或再次接近時買入，因為匯豐同其他股份不同，我很難相像佢會跌穿呢個三角形支持位，皆因由圖形睇，跌穿左之後會回到好多，但匯豐息率咁強，而且本身又無咩問題，係唔係真係可以俾人洗到咁盡? 我對呢點確實有懷疑，因此，我只有一半信心佢會跌破此三角形，事情會發展成點樣，大家一齊開定冷氣，打定邊爐，齊齊睇好戲吧!

強烈建議各位係呢段時間盡量儲錢或找辦法增加自己資金，因為大家正處於一個難得買便宜貨的機會，而家唔買，將來大家又會想當年了!!!

第十一週 美元破1.39

eur 日線圖

eur 8hr

eur 1 hr


以上圖表遲左一日，呢個係15/9的圖，所以透露左少少第十二週既開頭~haha!!
美元觸破1.39之後出現一個較大規模既回吐，係日線圖上可以更清楚咁睇得到，係8小時圖上更可睇到一個好大既gap位。觀察左接近三個月，係每星期一既開市仲會出現gap，而且都必定會出現回補，呢個水位十分大，而且值博率非常之高，唯一要考慮既就係要等待合適時候作反手出擊，不過對於daytrader黎講應該唔會咁難，要返工既人士先會出現呢個問題較多。冷靜左差不多三個星期，我感到自己應該比較冷靜了，相信會慢慢重新開始，不過要提升每次質素，決定都係唔係十分鐘圖，只睇daily，8小時及1小時，但仍唔排除假若係晚上會睇一睇十分鐘圖參考入貨價。

匯控

好感動呀! 我個blog終於有第一個人回應，就係大口仔喇! 我剛早幾日先去你個blog睇~唔通blogger係有設定可以偵測有咩人睇過自己個blog?

港股繼續跌，20000萬關口已經失守，但係隻匯控強到無人有! 仲守左係120樓上，真係俾個叻俾佢! 勁呀! 匯控係次按風暴至今，仍然繼續係外地有動作，分別係越南，韓國等地，強!

美元仍然好強，連1.40大關都破左，真係無野好講了！

熊市策略部署

經過苦思一輪之後，我初步有左熊市的入市策略，最後首選係匯豐。係半年前，我亦唔會考慮買入匯豐，但係經過呢半年以黎對投資的更多認識，我不得不承認匯豐確實係好股，以往我會覺得年輕人不應該買入匯豐，應該買一些細中價股，博取最大既資本增值幅度，發掘另一隻匯豐，不過不得不說的是，匯豐的的確確係一隻可以俾到你有穩定現金流既股票，佢既股價爆發力係無其他咁強，但係佢的派息政策的確有哂交代，佢係一個俾到你有足夠安心的現金流地方，所以，我決定押注係匯豐身上，匯豐過往十年每年派息均增加10%，即使係金融風暴，科網股爆破，911，sars 等等~有增無減，而且匯豐可以以股代息，我可以選擇收股，這是非常好的，因為我可以變相增加自己的投資，真正係錢滾錢，而且匯豐每季派息，咁我等於可以加快錢滾錢的速度，雖然我而家唔可以買到很多的匯豐，但我相信呢個係我邁向穩健的現金流收入的其中一步！

今日打住咁多~下次再分享其他選擇

第十週 歐元觸及1.42

今週繼續無交易~等待一個調整~增加買賣勝算~減低虧損風險~
歐元觸及1.42~美元依舊強勁~各位繼續留意最新動態~

思捷遭洗倉

思捷係我早兩三星期開始留意的一隻股票，因為佢股東回報率很高，盈利年年增加，且派息高，因此股價亦穩步上揚，誰知...就係上星期公佈其盈利倒退後，股價隨即遭洗倉，問題是連一向穩健的管理層亦說出來年生意難做，要維持高增長亦感困難，加上歐元回落，令到思捷匯兌收入減少，更加係打了個折扣，股價由80蚊急跌至近日60左右，又一隻藍籌股好似細價股咁俾人掃低 ! 的確，本來我留意他的原因係因為其盈利有保證，加上派息高，係抵抗熊市既好股，但可惜係經濟衰退時，零售股確係首當其衝，尤其係服裝，我買平d或者買少件，都好過買咁貴 ! 同時我係留意思捷時，亦留意令人服裝零售公司IT(999)，IT早係思捷公佈業績前，已經率先向下插了，思捷公佈業績後唔多唔少都會影響到呢隻股票，皆因同類股，今日IT最低見過1.10，收1.13，兩個月由接近2跌到而家呢個境地，確實慘不忍睹！以今日收市計，息率高至9.38%！極吸引！市盈率7倍左右，P/B 接近 1 ，但要留意的是假若情況如思捷一樣盈利欠佳，則會扯高PE，同時派息減少時則拉低股息率，則到時會失去支持，呢個係風險之一。但有一點想留意的是，思捷主要業務來自歐洲，歐洲出現衰退，受影響是在所難免，但IT主要業務來自於中國及香港，又是否會受到重大干擾呢? 呢一點我近期想作出多一些的思考，歡迎大家一同研究，不過IT若跌穿 1 蚊水平，都可以話係一個好吸引的水平，上次曾係1 蚊水平附近已是05年中至06年初了。無論如何，都係等我再多作研究之後再看看，而且選擇多的是，即使這是好，也不代表我就要將不多的資金押上去。

近期對買股有了一種新的體會，其實不算是新，但以往只有認知層面，沒有現在那一種突然頓開的感覺，有機會再跟大家分享。

第九週 繼續冷靜?

我發現少寫左一週~所以即刻補返~費時遲d亂~
不過今週都係無野好寫! haha!!