牛得很!

誠如昨日所言，感覺上昨日是繼續升浪前的最後入貨位，若然如此，那麼今朝便可能是最最最後機會？今日開市跌百幾點，之後就一直扯上去，國指升幅更明顯最後倒升收市，成交增至七百億，恆指日線圖脫離整理區，彈升後昨日出現整固，今日仍在十天線上運行，若果只看恆指最終只升七十點，成交得七百億就以為無咩野就錯了，D股仔升到無朋友！搭哂火箭升空，我將名單裏有七至八隻升10%-18%以上，兼且大成交上，一係就像吉利一樣昨日調，但一日追回哂兼升突！此類股周街都係，牛一真係可以話最容易賺錢，不過押錯注升市無你份就慘D，我都有出現呢種情況，早日加注思捷，如今人地爆升佢就跌，今日思量過後，決定要主動一些出擊，再積極看多幾隻股作攻擊，在此階段死渣一隻股等佢升真係浪費機會成本，且看我隻卡姆丹克太陽能，在高位後跌至現時已兩星期，如果我一早套現出來買其他股，回報應該更高，因此，暫時計劃係如果找尋到有適合的出擊對象，就會找出組合內的弱股套現，換入值博率更高的股票，像我之前渣住的一拖、中國龍工、廣船，實在沒有必要跟著一起守住調整，換股買入突破股勝算更高。就像昨日看中的勝利管道一樣，今日就繼續爆上近7%破埋週五十天線，珠江鋼管也升4.5%，此板塊兩雙一齊突破，揀中板塊的機會提升，可能會成為組合的盈利大貢獻者。也看日前沽出的創科，突破已升久，雖然我相信佢仍會繼續升，但大爆升的機率始終細於剛突破的股，現時我打算採取主動些少的進攻模式，希望能在早期容易賺錢的時間賺多些，在後期才能滾得舊錢更大。

今日要提的還有數碼通，昨日收市公佈業績，對上兩次果真大震倉，今日升回4%，我的買入價偏高，於我認為是之前的假突破時買入，但幸好我在週線圖的判斷為大震倉而繼續守住，帳面終獲得微利。

牛市第一輪的升市通常升到你唔信，在懷疑中誕生，升得咁高，個個等回調再買，但個市偏偏唔跌，係要挾升，升到你唔信，升到你班散戶忍唔住入市時先至玩完，keep住繼續觀察派貨日出現的次數和頻密程度，還有大市成交量的配合，現時七百幾億，我仍認為仲有一大班散戶未加入，到佢地加入時才是第一輪升市完結吧！