繼續高位整固體

A股再跌，但港股回都唔回下，美股也是高位整固，昨日港股高開三百幾升穿21000但之後跌足全日，高開低走兼成交增加，是一次派貨日，上星期也出現過一次跌三百幾點的派貨日，要開始留意下有否出現派貨日增加，今日跌十點，成交量六百幾億，仍屬健康。

昨日做左個trade，因想將資源整合，決定沽出信義玻璃868及理文造紙2314然後買入廣船317信義玻璃開市5蚊，之後見佢無力，跌勢加快，急急腳4.9止蝕沽出，不再玩此股了！買過兩次都未賺過錢，結果昨日收4.7x，走得快好世界！買呢隻時博跟其他股同步突破，結果成交量未有擴大，買入時機錯誤，而且投入資金佔組合稍大，在資產配置方面要多加把勁。同步沽出理文造紙，此股只買入2%，為左用盡資金才買，昨日開市見仲有得升便沽出，點知原來沽早左！一路扯上去10%，沽在接近全日最低位！真係人都顛，不過收市呢隻股竟然跌返落開市位附近，係大成交派貨格局，幸好都沽了，呢D散貨都係小心D好。不過買入廣船未有如預期突破，到今日仍然整固中。昨日組合最傷的是冠捷，一日跌8%！重傷，一日就無左10%回報！近幾個交易日升時成交量亦無擴增，買盤轉薄弱，不過既然仍有利潤就未有打算在此階段沽出。中海集運日日升，升到無朋友，幾日就升左三成，無回頭追真係慘。

手上持股轉為9隻稍為集中一些，其中卡姆丹克、中國龍工、廣船、中人壽此四股近一週的整固走勢極相似，今日卡姆丹克於下午三點率先起步！終於突破近十日的窄幅整固區，升5.9%，整個太陽能板塊一起發動，保利協鑫都升6%。期望其餘股份也能早日一同發動攻勢。另一隻最飲恨的是思捷，買入時見其成交量及走勢改善而買入，但因此股基本因素未有大改善，我只當其出口股或超級轉機股玩，本來買入一成資金，但最後將其減至佔組合6%，怎料此股竟然日日升，都差不多日日成為最大升幅藍籌股，買入只有一週左右，帳面已升15%，真可恨將部份籌碼轉至創科，創科至今仍未改善走勢，仍處整固。

今浪和以往一樣出現較多換碼操作時的失誤導至回報降低，有時想轉入其他股博其突破怎料得不償失，以後回報必先好好考慮何股有較大上升空間及真突破機率較大，以免買入升幅不夠強的股，我怕中人壽是其中一隻，買入時是因預期A股會有改善，但始終中人壽太大隻，未必有細股咁大的升幅。

市場出現很多不同股相繼出現突破，動輒10%，不過我還是選擇維持現有組合，以免換來換去得個吉！昨日為組合加了一畢錢，此畢錢為數不多，是BB仔出世至今別人給他的利是，我為他的這畢錢成立一個成長基金，加注入我的組合內。不過估唔到昨日先入票，今日已經入左錢，我又無為意，所以無買到貨！有點兒失算。