港股價量齊升!

星期日我還擔心港股會因評級機構下調九個歐洲國家而令到呢浪升市被破壞，但星期一港股只是極低成交量下跌近二百點，令我放心很多，調整時量縮是好現象，且今日歐洲穩定基金被調低評級但歐市仍然上升中，且港股受A股自09年10月以來最大單日升幅超過4%帶動下，今日升左六百點幾，且成交量增加至六百幾億，收復了十二月高位，下一個目標當然是十月高位！當然，就算有調整也是理所當然的，但近呢兩星期有很多股票也出現價量齊升的突破現象，且是多板塊一同突破，出現很牛的現象，兼且成交量日漸增加，入市的人越黎越多，基於個人渣緊貨的心態下，當然覺得重新進入上升趨勢的機會很大。

昨日開始正式返返工，因兩星期無返工，積壓左好多野，加上好多人黎道賀吹水，完全無時間睇市，自己亦唔記得睇市，我最擔心的是隻2866中海集運，買入價是1.9，昨日以低位1.74收市，姊妹股316東方海外亦再創低位，當初追入時居然是此浪的頂位，昨日收市位已經應該要止蝕，但因形態未被破壞所以再想渣D，幸好昨日無沽亦無時間沽，今日隻股跟返大市升，升近7%以近全日高位收市且成交量增加，是我樂見的，雖未升穿返前高位形成一浪高於一浪，但起碼脫離危險狀態，入此股時一次動用三成資金，一買入後就跌，搞到我之後見其他股都三心兩意不知是否止蝕換碼，又上了一課，下次都係減少每次投入資金，亦可保留資金投入其他突破股身上，今次已經浪費了不少機會成本，在過去一兩星期已有很多股10%10%咁爆上去。另外創科669以量縮形態調整了兩天，今日亦再次出現價量齊升突破前高位，頭肩底的突破形態造得頗靚。兩隻內銀股工行1398同招行3968都有得升，工行成交量有升，但招行近幾日升都無咩成交量增加，而且價升亦相對較慢，表現不太滿意，若要我換股，我都會考慮沽出此股，交行被招行好，或買入其他類別的股仔也好。 這兩星期的建倉，扣除手續費已有5.4%回報，幸好當時決定雖然個仔要出世好忙，但都要買入股票，我怕我會錯過呢隻牛的初期。雖然現在回報唔多，而且可能一兩日又無返，但總算有得高興下先，點都好，往後日子都要靠買股票賺錢買樓，否則財務自由之路甚遠。

今日我張stock list除左一隻之外，其餘十幾廿隻全部都係報升，且大部份升4%以上，有數隻係升6-10%。近日價量齊升的突破現象，令我更覺不是一次假升市，若然怕是假突破的話，都建議可少量買入，牛市初期所能賺取的回報係最大的！而且正如好似係livermore所講，係突破關鍵位正確買入，其後係升市所帶來的初期利潤，係令你往後坐得安心的注碼同信心。

另外不得不提的是殘股翻生，比亞迪1211已經由高位85跌左兩年到去年十月得11蚊左右，但今年初至今，已經升左四成多，另一隻係思捷330，今年似乎炒turnaround stock機會率好大，就好似我重新看好內銀股一樣，思捷近月走勢亦令我有看好跡象，由07年120跌到最低5蚊，但去年11月尾出現價量齊升的股動，然後十二月至一月初出現量縮調整，近日上升時量增，跌時量縮的利好狀態，此股係另一隻列入我觀察名單的股。