調整要來了?

簡單交代，今早一開市見工行及人壽跌穿左近兩週的盤整區，於是立即決定採用昨日定好的計劃，沽出全數工行及人壽，沽時已經慢了，但總算好過無，收市時工行及人壽跌得更低！沽出後隨即買入中國智能交通1900及數碼通315！其實昨日午市已經有意頭想買數碼通及沽工行人壽，不過都想等多晚，點知就係呢一日就有不同的結果，賺少了兼買貴了，不過買入呢兩隻股後，佢地就彭彭聲繼續上，好彩我買得早！不過返屋企後發現今日被恆指拖著，最後都維持唔到升勢，但收市都還高過我買入價，不過而家我擔心星期一會有大跌市，而家睇下歐美股似乎唔多掂，今日我又無時間睇市，收市先知太陽能股被人洗牌，錯過高位套現機會，希望佢能好似冠捷一樣升返上去，除左呢隻股外，其他股雖然都跌，但我卻覺得跌得幾健康，都係量縮跌回突破位或均線，不過始終而家係擔心星期一個市，如果歐美今晚收得差，怕會將本來健康調整的都拉落去。

近日時間對我非常不利，因為之後一星期，我預期將會近乎無得睇市，因為威記剛打來話小兒D尿驗到有菌，已經係第二次再確認有菌，所以聽日要去威記住七日打抗生素，我要六晚都係果度通頂照顧BB，我的精神狀態未必可以令我睇到市，但願只是大漲小回格局吧！我睇我手中持股的調整都幾健康，剩係睇今日我又覺得無咩野，我仲覺得今日只係震倉嚇走D人，之後挾升，純睇走勢我覺得都幾似，兼且今日跌市只是成交七百幾億，沒有量增，睇大市就唔係派貨日，而且尾市最後突然挾返一百點上黎，不過都係果句，呢D野隨時變，就算今日唔係派貨日，星期一大跌都可以係派貨日。內銀股係今浪起先領漲股，但率先下挫，頗為值得留意。下星期未必可以係度同大家見，祝各位可以順利渡過下星期！