散戶心理

大市升左三日又回吐返一日~跌左差不多三百點，成交額唔夠900億，隻化肥昨日由7.35升上7.48，得7600k，又係比往常少，近呢幾日化肥處於貼近技術阻力位，所以大家都係觀望下，買既又唔夠膽買，因為唔知仲會唔會升，呢排我都聽下收音機，留意下d散戶心理，呢一類反彈市，同預期既都係差唔多，之前有蟹貨既都係問下應該點算，有d會問係咪因為沽，有d會問好唔好溝淡佢，個市一黎就成千點上，d人唔夠膽入，見個市陰d陰d幾百點繼續又上，又唔夠膽買，結果個市就一路一路升上去，有趣！恆指已經企左係250天線上面兩日，今日收24311點，而家每日既一升一跌都會牽動住各位股民，究竟恆指仲可以升幾多呢? 我都係繼續維持25000-28000，之前唔相信的人開始半信半疑，分析家亦都個個話望升返26000 跟住再28000，有signal時大家就要醒水，唔好連自己都陷入反彈市迷戀之中，所以都要時刻保持警剔，保本係首要任務，留得青山在，哪怕無柴燒！另外，昨日A股大彈6%，今日恆指跌，A股則繼續升，A股係時候發威反彈了嗎？大家繼續睇下呢場戲點演啦！

中國自動化 569

下星期4月9日就會公佈業績喇，今日打算當係學習諗住計下佢預測全年業績係幾多，不過發現由於收購而做成既股份增加係發生係今年年初，所以不會影響去年既每股盈利，但係就會計落下個年度。除非自動化去年下半年可以扭轉上半年某幾個部門賺少左錢既情況，如果唔係可能會達唔到每股盈利0.16甚至0.15既情況。如果佢有能力可以達標，相信都係值得投資既公司，不過都係要等佢出完業績之後先可以研究下，始終佢係國內係龍頭地位，如果佢都唔掂，其他更加唔洗諗。

反彈市初形漸見

反彈市初形漸見，此話何解? 大家睇一睇今日東方財經既頭版講咩，就係話昨日港股升千點，見牛影！呢個亦係我等既其中一個signal，係熊市中既反彈市，會被人形容為牛市未死！港股近來繼續出現唔理外圍現象，雖然A股繼續跌，拖累左港股升幅，但係昨晚美市跌，港股都係唔理，今日高開72點後繼續升，最後以接近400點收市，港股又再連升三日，聽日清明休市，下星期再戰。

且看恆指一年圖及MACD同埋RSI

恆指一直向下，不過由高位一定跌落黎既下降阻力線已經近期被破，而1月22號同埋3月18號所做成既底係MACD同埋RSI亦出現背馳現象，恆指黎緊將會先有一輪升勢，之後先會再次回落，反彈市將會繼續。今日化肥亦收報7.35。

美市，資金流向，化肥

化肥連升左四日~一口氣升左上7.25收市~昨晚美市大升288點~香港開市最高升左一千點以上，收市升七百幾點~但係化肥就未能繼續創高位~高開7.5後逐部回落，最後收市報7.16~成交量大大縮減，只有9,454K，比起往常成交量跌差不多一半，若看圖形，化肥今日不能承勢升破，主因係化肥已經升至三角形既下降線(should be 下降三角形)，大家都知好多人睇圖做人，大家都不敢惘動，都係睇定d先，所以係高位成交量得咁少，化肥相信會係升得快回得亦快 1)假若黎緊美市回吐出現跌市，相信化肥會跟隨外圍跌，咁可能需要落到六蚊左右，甚至有可能破位向下，但若然去到果個位有最後的反彈市，就應該可以順勢破左條阻力線向上繼續延伸 2)若然美市繼續升而化肥唔升，咁安全起見就要考慮套現先 3)假若美市升而化肥繼續升上去而破左阻力位，咁就無問題，繼續持有，直至氣氛又再高漲先放 4)最後一個就係美市唔升但係化肥自己升(我相信無乜可能！)

博老較樂觀，所以傾向第一種，可能我有少少係天生的賭徒，我傾向認為係四月出現大型反彈市機會好多，反彈市氣氛仍在蘊釀當中。1) 第一季資金撤離股市係980億美元，基金持股量低，現金多，必須增持股票成份 2) 剛踏入第二季，基金係第一季狂洗倉，第二季要有表現必須從新部署吸納股份 3) 港股三月尾已經出現奇怪現象，美市跌A股跌都唔理照升 4) 美市開始出現反彈，不過A股繼續跌，相信A股距離反彈日子不遠矣，等A股同美市一齊彈，港股將會重新飛升 5) 市場不理會壞消息而繼續升，例如瑞銀換主席，增加撇帳，美林亦撇帳，但無人理會！ 6) 市場開始相信壞消息已經完結，並預料四月會有升彈市 (投資者憧憬可影響入市意願) 7) 好多股份已經跌入長渣抵買既領域，吸引投資者買入，助長回升 8) 反彈市既散戶氣氛初見形成，大戶仲未整夠高去派貨，當人們唔信會穿d高位點知又穿左，開始有人追入貨，呢個時候先差唔多要走人 9) 黃金急跌，油價亦跌，美國樓市不穩，新興市場回落得深，市場前幾個月有咁多資金係呢幾個市場走左出黎，究竟d錢最終會去左邊？好大機會當然又會係返返股票市場，所以種種跡象顯示四月份股市回升機會十分大。

風險：1) 化肥pe仍高，以e/s 0.2144計，現價p/e仲係33倍，下跌空間仍十分大 2) 下降三角形形成中，假若跌穿，回落速度將會快且深 3) 恆指今日無力繼續破上250天線收市，有隱憂，上落市繼續，但不排除回幾日氣再上！只需等等外圍股市及A股配合。

博一博！之後唔洗搵命博！

偉大既格林斯潘叫做格老~咁大家都可以叫我做博老！博老命！

而家仲係度為我呢個blog既投資組合改緊名，如果大家有好介紹，不妨提議出黎聽下。
主要投資組合就當然係股票，仲有外幣，暫時係咁多，打算每半年(6, 12月)做一次評檢睇下個投資組合狀況。今晚就睇返下d外幣，好耐無望過，都要睇下近排發生咩事先。剛睇左陣外幣，睇歐元，皆因之前我所喜愛既英磅近排實在係太不濟，都係睇下歐元硬淨d，似乎就黎到買入時機了！話唔定今晚就係入貨好位！有機會同大家分享下！