希臘通過首項緊縮政策

今日希臘投票是否通過緊縮政策，如果唔通過都幾頭痕，所以通過機會非常大，反對黨唔會咁玩野吧?不過希臘人都幾自私，國家有事，大家都唔肯緊縮開支，情願破產唔認帳，一個政府平時提供過多福利真是不好，令到人民越黎越懶！

今日工作繁忙，其實逄星期三也是這樣，全日開工都無摸過部電腦一下，所以無得作任何操作！周生生果真下跌，六福公佈業績後震一震又上。莎莎走勢麻麻，今日操作不到，否則今日都好大機會沽左佢。昨日原來山水水泥震過落突破位一瞬間，錯過了買入的機會，今日再升了。機會就是這樣，把握不到實在可惜，但會繼續留意。

希臘緊縮政策通過，美股暫時表現都是正面，看看明天能否幫補下d股仔。

沽出銀泰百貨 換入東岳

早上沽出銀泰百貨1833，然後換入東岳189，再一次敗於操作手法上，心魔難以改變，相信要再多的教訓才能改變我的操作法方，早上未能於高位沽掉銀泰百貨又是敗於自己的孤寒心魔！仲要沽在差不多最低位，然後追入東岳時又孤寒結果高追了！真是大大的教訓，雖自覺
近來增加了的買賣次數確實加強了些許技巧，但也需要繼續學習，最後東岳未能守住早上升幅，收市收窄升幅好多，最後都要即日蝕，不過好過銀泰百貨，因為被起我賣出位仲要再低！假日做功課時，檢討了持股中走勢不好的是銀泰、百貨及周生生，今次選擇沽出銀泰百貨是因為上升雖然向上企回於短均線上，但並沒有放量向上，有可能上週是假升的。百麗國際1880上週也是企回於短均線上，但卻是配合成交放量向上，因此有可能是真升，結果今朝百麗也是跌的，但下午已經倒升返收市。周生生116上週也沒有帶量自均線反彈向上，但因今朝升得多有5-6%，且除周生生外，六福也是向上升，因此決定保留，今日的量明顯比起上一週任一日放大了，且和六福一樣，已經是接近創新高，所以無放出也正確。繼續觀察往後發展，不斷學習！另外比較擔心隻利信達738是否有動力繼續上升，不過今日成交量依然是很好。

除銀泰百貨走勢恐怕不好後，另一原因是有其他股正蘊釀突破，今週目標是東岳189或YGM375，不計我買入手法差，此兩股已經接近突破位，東岳形造雙底，今日買入算是偷了步，今日成交也大，但收市於中下位，似乎有點隱憂，要看看這一週生唔生性了！YGM穩步發展，若然今朝選擇YGM，收市將正回報，但被我揀，我都會揀買入東岳，一來組合實在全部也是消費類，想分散一點去其他類別，二來東岳上週的大成交震倉令我感到有好實在的買盤支持，若能成功突破雙底，應可有不錯的升幅！所以選擇買入東岳。

上週買入的joyce647今日成交很大，上星期五也是大成交震倉，雖然無咁表現，但起碼也能令我稍安心。隻莎莎178反而令我有D唔知佢想點的感覺，之前四週成交量也大，但股價不動，不知是有人入貨還是怎麼樣，總之就係不動！再不升的話，恐怕缺少動能就會跌。

今日恆指相當唔生性，被國指拋離哂！不過好長一段時間都已經係咁，無辦法，恆指有匯豐、中移動、思捷、中人壽等股，想升都難！講開思捷真是慘，真係無股可以長渣，一代股王都淪為咁既地步，而家只係值23蚊！睇下佢幾時俾人踢出恆指成份股。

升勢確立日!!!

終於等到恆指出現william Oneil所講的升勢確立日喇！5月尾都出現左一次假的升勢確立日，今次應該是真的吧！昨晚美股急跌二百幾點後回升至只是跌五十幾點，今日溫總出黎講句說話，話通漲已經得到控制！亦即水緊情況可以舒緩，市場當然高興啦，A股升2%，恆指升1.9%終止五週連跌，國指升3%！尤其國指走勢一直比恆指好，3%的升幅及今日的成交量增加，今次的升勢確立日比較真實一些。組合亦已回至正數，相信已捱過最艱難的時候，今日好多股已經開始出現無朋友升勢，之前一直mon住但無選擇買入的東方錶行今日升左超過一成！有咁多股出現相同形態但突破後的升幅表現有勁有普通有弱，我都想花多些心血研究一下如何在走勢類同中選擇有最強回報的股，畢竟注碼有限，而且機會錯過就無，就像前日買入的joyce，這兩日都無甚表現，但YGM卻有好的表現，在餘下時間要加把勁學習如何選中強勢機率大些的股，以及有好的沽出獲利方法。

港股又跟唔足!

難得A股升，港股又跟唔足，低開後在下午曾倒升，但尾市又殺返下來，港股仍很弱勢，道指仲跌緊170點，真係頭痕！不過就來到6月尾，自不免又在想一傳統智慧，五窮六絕七翻身!?今日組合回報相對穩定，只是微跌，感到萬幸了！

忍痛沽出友佳國際 買入joyce

今次上了寶貴一課，唔止蝕後果真係嚴重，要戒除抱有希望呢個不良習慣。友佳國際跌穿8後及跌多於8%後沒有即時止蝕，此股亦買賣差價甚闊，今日決定要忍痛斬掉！此舉已非止蝕，而係為了套現現金，將資金轉移至下一隻有機會反勝的股身上！今次呢次跌浪，事後看回止蝕中航科工做得不錯，換入的利達信更有表現，亦已將止蝕的錢賺回。但無於跌穿8%時立即執行止蝕則為大錯特錯，此舉對組合亦做成一定影響，幸好這兩日各股回升，組合靠其他股的表現已變回正數！這兩日再次翻看圖勝天下，賺錢不一定每個決定都正確，只需每次虧損都控制在最少範圍內。

今日換出了友佳國際的注碼後，立即買入647 joyce，不過逄星期三都是我不在公司的時候，所以作出換馬行動時joyce已經升了，但仍以0.99買入，收市報1蚊，joyce兩日已升了10%，今日是突破後第二日，還有就是原來明天公佈業績。

不過回說今次跌浪做得最好的決定應該是更換了整個組合，因為之前的三寶都嚴重地跌穿所有支持位，若然沒有換出，後果更慘不忍睹！

現時持有之股票有：銀泰百貨、百麗、IT、周生生、莎莎、利信達、joyce
全部為消費類股份！

恆指失守22000

昨日恆指繼續向下插落去，最後亦失守22000此關，倉位今日出現大規模下跌！這樣的下跌方式令我想起一年前我剛建倉時的情況，當時跌穿19000點，很多人也認為熊來了，果時又係好多股突然幾日跌一成，最後守住了，當日成為全年最低位，今次未知能否如上年一樣調頭回升。倉位全部報跌，友佳情況最嚴重，被人成為套利對象，表現最後是剛突破買入的利信達，在此水平，我選擇繼續守住個倉，賭一注牛市不死。

更換組合後第一次負回報

恆指死氣沈沈，奮力反抗左幾日後，今日終於失守，是更換組合後第一次負回報，想想下除左去年剛開倉是負回報，就好似已經未試過了！大市無起色，唔上唔落，早兩日低開高收，但今日竟然玩野，來不個高開低收，收在低位，確實消磨意志。以今日來看，昨日沽出中航科工換入利信達是正確的，今中航繼續跌，但利信達繼續上升，但這一注是組合最細的一注，影響不大，反而有心想這一注做多一些短線操作，磨練一下技術策略。雖然個市唔就，但世界依然運轉，唯有自我進步，繼續學習。

沽出中航科工 換馬利信達

中航科工自上週出現射擊之星後便持續下，走勢轉差，亦恐怕會調整多一輪，無係高位賣出獲利實為不智，交易方法有待改進，經常抱持太多的希望，影響了回報。雖然未到止蝕位，但因有另一隻股利信達738作出突破，若看其圖，前三週都出現成交量大增，量增價不升，代表有人入貨當中，其中一個就係主席增持，在6月1-3日都在場內買入，單是昨日的成交量就已是過去三週裏任一週的成交量，今日繼續配合成交量向上，因此作出換馬將資金換入獲利機率較高的利信達。因今日有空時利信達已彈升了，不過也沒考慮太多，買到貨重要一些，也要改善自己斤斤計較一兩格價位的惡習，最後以4.83沽出中航科工，即時以4.17買入利信達。收到通知後再計一計中航科工蝕左幾多，由賺轉蝕不要得！

恆指力守 近底了?

今日恆指最多跌近三百點，挑戰低位，但收市扯返上去收市，全日只係跌五十點，成交八百億，今日是轉換組合後係即日市單日蒸發得最多的一天，午後曾經有一刻7隻持股全部報跌，而且一瞬間突然全部急跌，感覺有人恐慌沽貨，之後期待著的單日轉向出現，由低位逐步返回開市價，感覺市底有良好支持力度。弱股恆弱，趁呢浪調整買入近期強勢股，黎緊恆指回復上升走勢就食得應一些。

中原指數99.43

經過上次日本地震一疫調整後，樓市已經重返之前高位，最新的中原指數是99.43，破百大關指日可待，可能下星期已經破了！不過環境已開始變化，按揭息率回復至正常水平，當SSD的貨解禁的話，市場又會出現沽貨獲利盤，樓市越黎越危了。

買入莎莎, 加碼銀泰百貨

昨晚想了一晚，最終決定將剩餘資金買入莎莎178及加碼銀泰百貨1833。

美股急跌二百幾點，今早恆指開市都肯定跟硬，造就入市機會，開市前已經坐定準備入貨，莎莎178昨日第一日突破，趁早買入免得將來又高追心酸，開市時即以4.9買入莎莎，之後跌落多一兩格去到4.88已經全日低位就回升上去了，收市報4.97。另外銀泰百貨1833就花了我很多心機就買到，此股今日相當硬，開市已見承接力很好，恆指跌咁多，佢都係微跌，於是更令我覺得今日要買得到，費時又後悔，不過今次買貨又再一次睇到自己的盲點位，實在太孤塞了，為左一兩格錢浪費入市機會，見佢13.44，我就掛13.4，之後上到13.46就再改13.44，升到13.48又再改13.46！最後佢一路扯到13.56，我決心掛13.5，最後一輪買盤後，就回軟返最終可以13.5買入，但很明顯就因為我貪平果一格，最後我要追多三四格先買到！真係因小失大，呢個弱點經常出現。幸好今朝決心要入貨，最後銀泰百貨逆市造好收13.78升2.23%！恆指跌近四百點，呢隻股都可以咁，真係夠強，若然聽日平平安安，今週就會是再一週帶量上升了。

雖然恆指又再次急跌，但觀乎多隻股仔，走勢已突破或眾多股已很近突破點，市底相信不太差，呢幾日若然繼續整固，有錢的就不妨揀些股來買吧！不要浪費這次大好機會。

2011年6月投資組合變化

發現無寫到5月的投資組合變化，不過剛剛過去的5月，我的整個組合真的180度轉變了！以往我會喜歡買入價值被低估還未被發掘的股，但這方法比較被動，且會浪費不少機會成本，而且基於家裏財政狀況出了變化，在沒有新資金流入下，必須要採取更主動的方法進行投資，因此才決定轉換方法，期望有更好的投資回報。

在這個5月沽了所有持股包括中國全通、嘉華國際及華潤微電子，詳細內容在之前的文章已經交代了。然後在剛剛的兩星期內，分別買入了6隻股，包括銀泰百貨1833、百麗國際1880、中航科工2357、友佳國際2398、IT999及周生生116。

各組合持股百份比如下：
百麗國際1880：20.4%
周生生116：19.6%
IT999：14.6%
友佳國際2398：13.3%
銀泰百貨1833：9.8%
中航科工2357：5.2%
現金：17.1%

今日睇返轉頭，資金調配仍有好大的改善，現金多出來的幾乎全部來自套現嘉華國際得出的，但仍未買到貨，不過嘉華今日就造好，白白浪費了這機會成本！但這也是難免的，以我性格，見佢咁樣升返，又未必放，可能又會錯過買入更好股的機會，經驗始終是要累積的！這兩日亦因為返工未能睇市，錯過了今日突破向上的莎莎國際178！今日係第一日，一突破左4.83此關即繼續上攻至5.06收市，全日升接近8%，今週將是第一週帶量突破向上，追入就要快。現時仍考慮將剩餘現金加注入其中一隻股增加持股量及買多一隻股，又或全資買入一隻，這樣的話，持股數目將會變為7隻，我自己都難決擇，集中投資當然好，太分散的話亦會將回報率攤薄，但看到眾多股也出現突破，就想買下所有！買完後發現原來現時6隻有4隻都是零售股，而且我將觀察名單正在臨近突破點的其他股也大部份是零售股！看來這一浸升浪也似是由零售消費股帶動。

IT 999報復式上升

昨日隻IT 999被火燎森質低後，今日IT出現超強的報復式上升！一日升左0.99，升左15%！昨日震倉撈到底的真是笑到喊！雖然昨日令我心驚膽戰，但若不是昨日買了，恐怕今日咁樣升法都好難買得落手！恆指升接近500點，成交量較早幾日已增加300-400億，我相信很大程度恆指是已確立脫離底部區，呢一浪上去又可能是一次報復式上升急衝，因為之前慢慢陰陰跌，而家好多人要追貨，要買趁手，我都仲有一注正苦惱買咩好，有D因為之前資金所限，所以買唔夠貨，因此一係就加注，一係就買新貨。

今日隻中航科工2357有異樣，返工都唔得閒看，今晚返來發現隻隻升得佢跌，仲要跌超過3%，睇一睇成交仲得人驚，竟然有1.29億股！平時只係二千至三萬股成交，今日已經差不多是有一週的成交量，好大程度係唔知咩基金沽貨，莫非咁快就已經又見頂整固一下?好似未免快點了吧，仲有兩日時間，要留意能否改善返條週線。

之前果三寶，全通，嘉華同微電子真係抵打，我放左佢先回升返，早一兩日升定俾我好D位沽唔得架咩>.<