寶寶出世喇!!!!

寶寶終於忍唔住要係今日出世喇！我覺得佢生得算快，等媽媽唔好咁辛苦，快到我速度真係遲少少我都睇唔到佢出世喇！昨晚醫生仲話老婆仔可能係假作動，如果無野就今朝出院先，點知三點半就打電話黎話我知開左一度，七點幾都仲有聯絡，因為我有事要返工搞，都打算十一點就走人，點知十點九個字老婆打電話黎話開到八度！嘩~我唔係聽錯吧！因為之前先一兩度，點會突然間開得咁快，於是拿拿聲飛的走人，仲打左個哥仔尖，我同佢講我老婆生得叫佢讓我！去到時十一點過些，又唔記得係公司拎個口罩，結果又要跑返落地下買口罩再上返產房，搭多幾個字就已經要入去了！BB已經好想出黎喇，見到老婆仔都應該真係好辛苦，無哂力咁個樣，個口唇仲甩哂皮好似濕度係零咁，原來昨晚兩點幾已經無再飲過水，BB好乖，好順利就出左世喇，又唔洗開刀，所以老婆仔真係好勁！好多忍左十幾個鐘都係度數太少，最好要開刀，姑娘同我地影左兩張合照，見得BB幾面，我怕我都唔認得佢。

話說等緊老婆仔返產後房時，竟然咁都被我遇到大陸人衝關生仔！急症室送個媽媽上黎，D大陸人又唔識路，迷路，搞到D姑娘要的紀錄都無，吹左佢地十萬次都未有，倩係入面話D姑娘爆哂粗，因為呢個case令到入面好緊張，原來幫倩清潔同護理的人都要去果個媽媽度，令到佢要遲左差不多成個鐘先上返產後房，因為呢個媽媽個BB係腳先出，已經伸左出黎，呢D有難產風險，所以好緊張，都唔明佢地做咩要咁搞，對個胎同自己都唔好啦，咁樣真係加重左醫護人員的負擔！而且會影響到本身開工做手術的媽媽，要知道做手術只係得一team人！另外仲有一個逾期居留的媽媽生完後就俾警察拉左，前晚又有一個媽住青衣又唔知做乜事就黎威記，應該都去瑪嘉烈啦！真唔怪得D人要反大陸人衝落黎生仔！

航運股強勢

昨日2866中海集運宣佈下月加運費，航運股有機會過了週期性低谷，316東方海外已經突破低位然後上升第二星期了，發現此股遲了，買不到，在這疲弱的三天，他仍能連升三天，2866則突破了兩日，這兩股是可買入的目標。現時繼續留意板塊情況，最先出現突破的板塊往往能成為之後領軍股，越早介入越好，在剛突破時買入，回報對風險比例高。

669創科實業買入後第二日出現整固，暫時還可以。恆指依然很弱。

買入669 創科實業

今朝太太第一次見紅，所以拿左一日假，諗住等作動頻密D就去醫院，點知都只係間唔中幾次不規則的，所以今日變成多左日假，係家中睇市部置買股。

大市成交淡靜，成交量低，但發現觀察名單上的669創科實業出現價位向上突破，升穿頭肩底頸線！不過之前試過追入999IT突破失敗及中國聯塑的假突破，因此決定睇定D先，睇埋下午先決定入唔入貨。兩點半後發現價量開始上升就落盤，點知又係慢一步，落完7.91後，出返黎已經見到個價去左7.97，於是唯有set返高個價，去到7.95，最後結果係等左半個鐘後先成交到，但又再一次成交完就跌落去，心諗唔係又中伏吧！之後5分鐘圖跌到最後收市一條bar最低見7.87！但最後幾分鐘又再出現量升的成交，最後收返係7.95，好幸運地可以升返買入價收市，雖然全日量不算十分巨大，但過去八個成交日，上升日子的成交量也是頗大，而調整日子出現量縮，今日收市位也是由8月跌市後的收市高位，繼續觀察。

今次交易動用了三成資金入市。

恆指已屆關鍵位，向上定向下好快就知曉，A股真係令人怕怕，不斷尋底，今日尋底後平收，唔知幾時先識停，美國就係威係勢了，此等現象可能就是反映大陸經濟增長放緩，但美國似乎復甦較快，在中美歐三地比較之下，美國最好，中同歐則各國面對不同問題。現在留意的板塊是內銀，如中國想保經濟重新開水喉，減存款準備金，則內銀股係幾年受壓後有望重新睇好。另外是航運股，尤其做美國生意出口的航運股，此類股價殘，值博率頗高。今日發現燃氣股也很穩陣，似乎政策出現些改變?燃氣價格可加價，而且收購私有化不斷，做燃氣管道生意的也可留意。

對股市暫時的看法

觀察了好一段時間，對現時股票有些少看法，有一類是之前很牛的板塊如消費類股等，現在看也像是一個做頂格局，沒有潛力再領軍，而且再發展下去的話，走完第三階段的走頂過程便會迎來第四階段下跌，相反，另外一些是下跌了很久或沈寂了很久，在上一次沒有怎大升或捱打的，正脫離了第四階段的下跌而進入第一階段的築底，從值博率及回報上來看，此類股看來更有睇頭，因此，搜尋脫離第四階段並而進入第一階段的股是當務之急，早此分辨出領先板塊，便能在股份進入第二階段時早些介入增取更大回報！股市成交逐漸縮減，無人想買貨，又無人想沽貨，萬一在此時脫離股市太遠，將會很難觸摸到未來慢慢出現的氣氛轉變，所以本人更覺現時應更留意股份的價量變化，分辨好壞股份。再者，現時缺乏買賣氣氛，很多人亦已靠邊站離場，這時候正是大戶莊家等收貨之時，到股份出現良好的價量齊升，並市場氣氛好轉時，亦可能是大升之時，因此，此階段實不宜離場過久，以免壞了大事！

2011年最後一個月

自從無買股後，已經好耐無出文，小朋友就來出世，呢一兩個月休市期正好用來準備迎接小朋友，以前圖書證全部都是借投資書籍，但呢一兩個月已經全面轉營，甚至出動埋老婆仔張圖書證，所借的書全部變成育兒書、坐月書、護理書、食譜等，雖然都有多次想買股，不過無咩目標心水，至終都係忍手唔參與就算。

近日樓市講政府放寬政策，不過曾特首今日都出黎否認，查實而家盤源真是好少，09年借落低息錢買樓的人唔會放，樓價貴左，利息升左，即就算將自住單位放左再買返同一個單位，都要俾多左樓價同供多左錢，既然係咁，市場上根本就唔會有人想放盤，昨日同老婆講過呢個問題，簡單地計一計，最後上網禁下按揭計算機，同我所想一樣，只係沽左現在我地住緊的樓，買返一樣大的樓，每個月就要供多4000蚊！所以邊度會有人放盤，我睇樓價只會繼續係呢個位牛皮，最怕係外圍有大穫野，突然一下子sharp drop，乾跌，咁就麻煩手尾長了~