第十七週 美元繼續爆升!

eur 日線圖

eur 8小時

美元勁到乜咁! adx 繼續上升! 美元勁到震，究竟會繼續上升，定抑或會來一個外幣大反擊!? 很緊張刺激呀!

彈返1500點俾你!

昨日一片風聲鶴唳，今日d人發現市場大量平貨，開始又買返貨仔，由昨日收市升1580點，收市報12596點! 昨日創97年以來最大單日跌幅，今日則創11年來最大單日升幅! 真係咪話唔嚇死你! 昨日匯豐收市報75，今日升15蚊收90!!!! 升20%!!! 匯控黎架喎! 一日升20%，真係唔知呢個咩世界! 昨日落唔到的75，今日當然也落不到，繼續等待，不過今日開始有少許不耐煩了，很想入貨! 但又好似未到價咁個樣! 唉! 咩都唔做原來最難!

失守11000點

真係唔好講笑! 上星期先失守萬四~過左兩日~萬一都曾經失手~今日港股跌千六點! 收市報11015點，最高跌1942點，跌穿11000點，今日好有股災味道，睇黎熊二既超級暴跌色轟炸機仲未完結，匯豐先顛，由上週100跌跌兩個交易日，已經跌至75蚊，真係估唔到，匯控可以跌到咁平! 今日收市競價市段想買75蚊，可惜入不到。不過下星期都仲有機會，匯控跌到咁樣，暫時黎講，反而我覺得已經比我target既細價股更具吸引力，因為匯控唔知可以留係呢d水位幾耐，但係細價股我相信都要一段長時間先可以升返上去。所以暫時策略又想變動，想轉移至匯控身上，長遠黎講，呢隻現金流怪魔好吸引! P/B竟然跌低過1 !!! 息率可以有9%! 股價嚴重脫離基本面，將來又會有人話，早知我海嘯買匯控啦!

失守14000點

恆指今日收市報13760，終失守14000點水平，咁快去到萬三點水平，比我想像中快了差不多有半年! 近來的走勢已經給我一種陰陰跌格局的感覺，同美股一樣，一日突然上落幾百點，好似係家常便飯，現在係熊二熊三可能已經無咩重要，最重要係揀多一隻o岩既股長線買入，不過近日呢種俾我既感覺，感到是熊三多些。由自動化急升學到一樣野，就係你唔知邊個係底部，所以如果跌入可吸納水平，你就開始分注買入啦! 因為你真的不會知道底在哪! 今日老婆仔買入5號仔一手，係100蚊買入! 本來已經決定唔入，但因為我其他target既股都未跌到我要吸納的水平，所以同老婆仔相討後，決定先買入5號仔，座底每年收息7厘(下年應該係7.7%)，皆因100係極具吸引水平，且假若將來我想買既股到價，我可以放出匯豐買入我的愛股。老婆仔一注已用，現在只淨下我的一注了! 真係想快d儲多d錢，每月出得一次糧! 過幾日又就出糧喇! yeah!!! 之前買不到or無買匯豐也學到一課，耐心等待至吸納水平才買入，否則不要追，耐性係非常重要! 所以我樂意等待自動化及勤+緣快d跌落黎! gogogo! 今日自動化有少少回吐，但勤+緣逆市上升。

呢篇係開blog第100幅文章! 恭喜恭喜!

自動化急升之謎

自動化繼續升，今日升到最高1.44，就黎係最低位升兩倍了! 今日睇到太陽報同埋老曹既文章之後，我相信近日自動化真係同中央講黎緊幾年要加強地鐵基建既原因，而令到自動化受到追捧! 係0.5無買到十分可惜，不過我亦樂意慢慢等待佢再次回落至此低價才買入，只係由呢件事睇到一樣野，市場真係好鬼蠢! 0.5唔咁平無人夠膽買，升咁多之後就個個追貨，市場真係好多人鐘意炒! 我當時0.5不買係因為深信呢類股一定會繼續跌下去，但也真的想不到中央這些救市措施有意無意帶動埋佢，呢點又真係本人所忽略，但也沒有辦法，唯有繼續等待。

本來有自動化同勤+緣呢兩隻可吸納，但現在也只淨下係勤+緣，不過好消息係，佢今日最低見1.6，收市1.75，pe得返六既水平，看來三至五年前買入的人終於忍唔住手要放了! 咁就非常好喇! 不過仍然比較想等佢下月出埋業績先，因為好想睇下梁鳳儀會唔會講下面對銀行緊縮情況，會否拖慢或影響佢地既擴展大計，我不太擔心經濟放慢會影響佢既廣告業務，但若借錢方面有影響，就唔簡單了，勤+緣既短債較多，且應收賬款亦多，最驚被人拖數，影響現金周轉，不過係大陸資金係咪真係好似外國咁緊? 呢個我仲查緊(其實懶，仲未查)，haha!! 無論如何，等佢出左業績再買，點都安全些，不過若果係出業績之前呢段時間跌到好低，我又唔知忍唔忍到手最終會買...

自動化突然急升

中國自動化上星期跌到最低0.49~有一日突然唔知做咩急跌接近兩成，點知係星期五時突然大升54%!! 唔知發生咩事，除左果日係公司回購之外，都唔知發生咩事，今個星期一同二又繼續升，而家由低位只係幾日就去到1.16~ 升超過一倍! 真係唔知發生咩事! 公司回購渣喎!? 又唔似係因為炒中央托住基建內需既關係，總之就莫明奇妙! 總之佢唔跌絕對唔會買貨! 細價股爆炸上升能力果然好強，不過如果係咁，不如買返隻康健國際(3886)啦!!! haha!!!

第十六週

eur 日線圖

eur 8小時

美元仍有強勁上升勢頭，打呢篇文既時候，中信泰富炒外匯損手，佢都爆煲但我都仲未死，係咪叫執返身彩，哈哈哈!!! 本週無咩野特別~無事可記~

我對下一個牛市的少少預測

想不到信貸一話緊縮就真係縮到咁，呢樣野真係唔見證過都唔覺得佢既恐佈之處係邊度，可能好多人未經歷過97金融風暴，又或者當時不是受直接影響，所以感覺不到經濟出現衰退，老公公某程度上都算係受過97金融風暴的影響，所以我能明白到呢次財富蒸發可以帶來如何嚴重的衝擊，而且今次既衝擊係撞正金融體系，有好大部份需要靠借貸黎維持日常運作既公司遇到嚴重打擊，就算唔死都應該重傷。今日又有新聞，上市公司合俊集團係大陸既三間廠都因今次海嘯而倒閉，看來仍依重出口既中國都要頭一頭痕喇!

講返正題，雖然熊市已來臨，不過牛市總有一日來臨，等我都估下先! 熊市至今經歷左一年，今次咁大獲，點睇都唔遲咁早完結，而且經濟先剛剛受影響，下年之前好多股份業績都唔係咁靚仔，估計09年繼續都係咁差，我認為而家仲係熊二階段，不過到09年第一季初或尾，我相信就是進入熊三的時候了。咁幾時會見到牛仔來臨呢，我覺得好大機會係2010年，原因係有概念可炒! 就係上海世博會，同廣州果個唔知乜會，果年仲係世界盃(刺激下消費先! 又炒李寧!? 唔係卦!?)。09年尾至2010年好大機會係牛一開始，係唔信牛市重臨既時候上升，2011年就牛二，投資者半信半疑既情況下上升，係移動區間中上上落落，最後就緊係可喜可賀的牛三啦! 我估會是2012年發生的，下一次牛市頂部可能只係達今次高位多少少，今次升得咁多原因好大程度係資金泛濫嚴重，導致資產價格急升，而今次海嘯後，我估計可能會有監管機制對全球資金流動作出限制(純粹我估o者)，因此可能限制了過渡投資及資金泛濫等情況重演。若以2012年作為牛三頂峰計算，則大家仍有3年多些的時間儲錢買貨! 雖然未必買到如今如斯平的貨，但總算仍有利可圖! 無論如何，大家都係搵多些錢增強購買力!

識得實在太少了

早日看到一個大陸既blog，當中講及佢自己如何從年報上分析佢既看法，大家看同一份年報，但係佢真係實際客觀咁睇到好多野，但係我就只係主觀地專注於董事會的目標與大計，而且看完之後，發現自己還有很多很多的不足，真的學海無涯。而且最大問題係，面對自己實力不足，會大大減低左自己對揀o岩股份的信心，及形成心理壓力，面對一日一日過去的日子，仍然未能決定出擊邊一隻股票，的確感到頭痛。

第十五週 忍痛平倉

eur 日線圖

eur 8小時

呢個圖遲左一日save落黎，大家望一望個圖~上星期五晚美元狂升至1.33樓下，我係果晚覺得勢色唔對，忍痛止蝕，雖然蝕得好甘，不過都好彩，如果唔係承受更大風險，雖然今個星期事後證明只係突然插穿殺d美元淡友~但係亦無辦法，假若佢繼續殺，將會蒙受更大損失。係日線圖上，美元ADX繼續上升，美元升勢未止。繼續保持審慎態度作出部置，又或等待近期大市既異常波動。

大市反彈升1500點

港股係英國注資消息下，由14700水平升至16300水平，市場對利好消息繼續作出正面回應，即管看看幾時有利好消息也無人理！今日好多大藍籌都係升一至兩成! 細價股好似唔係太大反應，中國水務今日動用左2000萬去回購回份，之前佢慢慢回購左1%左右，今日勁大出手，今年已經累積回購了2.6%，股價今日曾穿過1蚊，睇黎公司真係頗有決心想保住個價！即管睇下佢最終會點。仍在思考如何部置入市。

分散投資

分散投資與集中投資~常人說唔好將d蛋蛋放埋一個籃，打爛就壞了! 老巴就話蛋蛋放埋一齊好，我得一對眼，望實佢咪得囉! 對於資本唔多的人，集中投資絕對好過分散，選擇一隻好股，然後將資金放哂落去，定期買入，將來回報必然好過你分散買幾隻，資本太少，分散來買只會將你的回報拉穩，而且也表示你自己也不知哪一隻最好(當然亦唔保證你選擇的是最好，有可能將來會發現自己押錯注)，不過我仍認為集中投資比將資源分配係幾隻為佳。

參加月供基金的人，agent實會叫你揀幾隻黎供，說分散投資，但這就是分散投資嗎? 我見身邊朋友們所買的基金都是新興市場或資源股(因前幾年大升呀ma!)，手上全是中國，俄羅斯，越南，印度等等，難道分開不同市場就是分散投資嗎? 可能是，但我相信全部分散係新興市場就不是分散投資了，因為佢地的相關度太高，若站係月供基金所講追求穩定回報的立場上，這樣便做不到穩定了，因為上落幅度會偏強。我認為係月供基金裏，除包含成熟同新興市場，必須有期貨這類基金才可以，若你全是股票類別，則你的組合很缺乏彈性，只有同時可買升及買跌下，你才能係升及跌市也有利可圖。不過開始時因資本較少，所以將佢地放係高增值的股票上也是可取的，但當銀碼一大，就要分配資源出來買期貨市場的基金才可平衡組合。

祝月供基金投資者將來成功!!!

港股最多跌1500點 收低於15000

恆指今日收14796，最低曾跌過1500點! 今週星期絕對係沈重的一週，恆指今週跌16%，跌超過2800點，日本係一週內跌超過24%，昨晚美股跌低於8600點收市。跌到d股好超值，超值到唔知講乜好! 不過亦因為咁超值，反而有種不要得的心態，就係想佢繼續跌至我想入既水平，咁樣諗可能會買唔到股，而家仲係度諗緊點樣可以個入市策略做得好少少。

好一個假v型反彈

昨日開市就跌穿16000水平，到下午收窄跌幅，之前試過兩次v型反彈，今次一定好多散戶以為又來一個v型彈彈彈，結果入市者即時蝕錢，皆因大市又再跌過，全日跌1372點! 好一個大戶玩野! 我鐘意! 昨日咁跌法，普遍跌一成以上，自動化得9毫子，勤+緣最低2.05，隻恆安國際真係強到你唔信，仲係守得咁硬，而且跌成千點，佢仲倒升，看來很難等到佢跌入射程範圍了。所以集中攻擊目標就所餘無幾了!

今日佑威國際u right宣佈清盤了! 真係大件事，俾銀行追數，趕到家下咁既田地，真係好可惜! 不過相信管理層營運方面都可能不夠審慎，香港中小企應面臨很大的壓力了!

淺談月供基金計劃

係呢一兩年financial planner大行其道之時，相信身邊不少朋友也有參與月供基金計劃，因每月投資額度可控制，每月供少少，年月日累積之後，到退休時就已有幾百萬可供退休，生活又有保障，且採用平均成本法，不怕大跌市，仲可以買到平貨! 相同金額，但可買到更多基金單位，長線黎講，回報不俗! 老公公只聽過AIA月供基金計劃，不過相信大同小異，經過思考幾個月之後，我只可謂，月供基金不適合我。此類計劃多數都係鎖你頭唔知幾多個月左右，取30年計劃，大概鎖你3年左右，即3年內每月都要供，之後才可停，有些是有年期限制，有些則無，即是話若你若由25歲參加呢個計劃，咁55歲時就要拎哂所有本走，如果你提早拎返哂所有錢，咁就要根據你同計劃仲有幾多年而扣你錢。點解我認為唔適合我呢? 原因係我覺得月供計劃缺乏靈活性，有太多限制，導致我不能好好運用已有資金及分配財產。

第一，平均成本投資法限制總回報率，或因月供而拖低回報率至很平均!

第二，你要選擇幾多%錢分別投放於不同基金，不能選擇鎖死金額。即就算基金已經升至不合理水平，因呢個限制，你每月仍要俾錢買貴貨。

第三，幾時贖回基金決定你將來財富如何。因提早贖回會扣錢，又或者假若你贖回時正遇上大跌市，那麼你的退休金將會少了很大的一截。

第四，當身邊的人都參加類似月供基金計劃時，即是你並沒有為自己將來增加財富，最多只是保持購買力。

以上四點係我想到月供基金所帶來的限制，我會逐個再講解一下，不過亦有些是可以有方法改善這些限制的。
___________________________________________________________________

第一點，因為月供基金的關係，你每月都俾錢供，雖係熊市可買到很多平貨，但當價格不斷升時，你變相也買了貴貨，雖然你可能會說，用錢買貴貨的單位是相對較少的，不過這也已經足夠拉高左買入成本，若然你係之後的大跌市前沒有走到，那麼你是有機會因為之前買貴貨而拉高了成本價，而最後錄得帳面虧損。若果你一直沒有理會而每月都係供果d組合(相信你的agent也不會叫你轉基金，除非佢leader醒目有咁既提議)，那麼你咁樣供法，其實到將來個回報率真是應該頗平均的，若不幸你是買入週期性基金，咁就更要祝你好運了! 因你應該可以見證很多次帳面有獲利的奇景。不過到頭來可能是一頭空。而且，請不要看到agent或者介紹該基金的資料寫住，自成立日至今回報率xxx%，因為呢個只會係一筆過俾錢先有出現到既增長率，若你是月供的話，一定無可能! 你大可以問個agent，咁如果我月供可以有幾多回報? 我諗佢都噁噁地。(佢應該會俾個圖你，然後話你知有大概15%左右)。

第二點，因你要決定資產配置，若果你認為某一基金所購買的價格已經夠多，你不能夠鎖定該基金的單位，然後將金錢投放係其他基金，若你一更改%，你其實就是賣回了你一些基金單位，然後投資去其他基金，呢個做法其實好有問題，因為佢逼你變左第一點，即谷你買貴貨，若你係整整熊市買夠貨，你只希望佢係牛市有所升幅，而想將剩餘資金放係第二度，咁就不行了!

第三點，呢個係我認為最不合理的地方，又或者係最無奈? 以今次金融海嘯為例，美國就有好多退休人士因為呢個大跌市而令佢地蒸發了大部份財產，原因係簡單，因為咁o岩今年係佢地要贖回的日子，咁就帶來影響。但呢樣野又唔係我地可以控制得到，提早贖回會罰錢，但不提早贖回的話你又會損失財富。

係呢度先作一個小結，若你想將來月供基金回報可以顯著一些，其實你自己也要做功課的，不能死買爛買以為agent會幫你，為要解決第一同第二點的問題，其實買貴貨也是少不免的，係熊市及牛市你可以不斷買果一隻，不過到左牛市頂峰時，你就必須要將該項基金套現，轉去其他基金，穩陣的話，你可選擇債券或保本基金，若想進取則期貨或對沖基金。因這樣可確保你將得到的利潤鎖定，之後你大可以係熊市時再將基金資產轉回股票市場等。這樣絕對可以確保你的資產得到增值而非只有帳面獲利。你可購買的基金數目必定可更多，對你下一個牛市起了重要的作用。所以月供基金一定一定一定要懂得如何轉換你的資產配置，否則老來得個空也。

另外，假若你能做到第一及第二點，那麼我相信你就會解決到第四點的問題。當大部份人都月供基金時，大家買的野其實好大程度亦係聽agent話事，都係話揀高風險呀新興市場呀，大家只有供多同供少的分別，財富除了看你有多少錢之後，還有相對性的購買力。若今日我有100蚊，我投資係10年後變成1000蚊，如果當年朋友A沒有投資，那麼佢10年後仍然係100蚊，那麼若是他和我一樣投資也變成1000蚊，那會怎麼樣? 其實你並沒有增加了你的購買力，試想大家也有相同咁多錢，願意花咁多錢，世界會是怎樣? 道理有如通漲一樣，貨幣流通量增加，如果大家也是月供兼且回報也是差不多，那麼在將來你根本不會覺得自己富有了，最多你只是作了個平穩的儲蓄。agent俾你睇話月供咁多年之後可以有幾百萬，其實若你肯自己認真計計，那些錢根本不會夠你過老! 這是我敢跟你打賭的!

所以你必須善於管理你的資產，咁樣先可以令你實則回報比別人大，「你不理財，財不理你」，假若你認為只需聽agent講每月供錢，將來可有可觀的退休金，我相信將來你可能會後悔，有時我也懷疑大多數的agent是否明白投資理財的要訣，皆因好多都可能只是搵兩餐，並不真正理解市場背後運作及資產配置方法。我認為月供基金最重要的除了是買甚麼，就是你如何管理他了，包括何時賣出及換馬。這很大程度上是決定你將來退休有多少錢。

係四點之中，始終第三點是最無奈的，亦係有年期限制的plan的最大缺點之一。其實強積金也是如此，也要好好管理才行，我以前都覺得強積金無咩用，一來無得揀公司，二來又是被逼的，不過而家就發現真的要好好管理了，就算一開始已是被動要供，但也不能不理，我相信我的強積金acc係退休時，應可被別人獲得更多的財富。

綜合以上四點，我就認為我自己買股票的靈活性同集中性可大一點，而且我亦不需要被逼買貴貨! 所以結論就是，月供基金計劃應該不適合我了。

下一次會同大家講一講基金裏的分散投資。

港股收市低於17000

今日港股收市報16803，終低於17000點水平，之前兩次均能單日收復企返係萬七水平。呢排港股走勢係陰陰跌，慢慢向下彈下彈下，升少跌多，呢種狀況更令散戶迷迷惘惘，不敢惘動。有趣 ! 自動化今日最低見1!!! 收市1.05，已經跌入可吸納範圍。另外，已決定不會係此熊市中吸納中國水務及IT。現時觀察名單已經縮窄了。只有匯控，中人壽，恆安國際，自動化及勤+緣。



匯控，中人壽及恆安均非常硬淨! 此乎無人洗倉的話，根本就很難慢慢跌下去。而且確實經長年累月慢慢跌既情況下，已經開始淨現一些有過得去的股息率之股票可供選擇，而且亦是係可見將來盈利增長均強勁的股票。匯控提供強勁現金流，可以安穩渡過熊市，可是現在其他股票而徐徐下滑，係未來的牛市，我相信佢地可提供的股價升幅可高於匯控。因此，已在考慮係熊市中死買爛買一隻，係下一個牛市中，相信可以有很好的回報! 最起碼可以足夠我買一層樓自住! 只要有第一層樓，咁之後既財富增值速度就可以加快了!

第十四週 美元超強!?

eur 月線圖

eur 日線圖

eur 8小時圖

eur 1 小時圖

美元本週確令我有些跌眼鏡，原因係過強，或者咁講，係市場認為歐洲很弱! 美元理應已經升至合理水平，但因預期歐洲更差，所以美元維持左超強勢。走勢圖來說，確實太強，月線圖上既超長期強力支持線竟然被破，老公公仲係呢個強力月線圖的下線1.39買入歐元兩手，若以月線圖標示，下試至50天線! 日線圖上，adx係上週到達25後，今週稍抬頭至27，美元仍未進入range市，不知會否轉頭回升係25-40中間，還是只係略略波動，需繼續留意。八小時圖，歐元仍未收復十天線! 且adx 向上! 而且bb下線繼續向下移動。1小時圖則adx跌至14，且匯價已於bb通道內波動。指標均指示美元好大機會繼續上升。今日有新聞講德國地產市場又有大單野，歐洲開會傾點搞又唔知會點，老公公聽完德國呢單新聞後，相信歐元星期一裂口低開機會大增!

上週唔記得講，上一週係第一季度結，acc係2285，三個月奮鬥仍在虧損中! 要繼續努力!

先洗未來錢

今日去上堂，講關係ageing，研究指出:自己支付生活費將會由2005年的22%增加至2035年的65%，社會及家人的支付比例將會維持係20%附近。其中一位出名的周教授問了兩個問題，你有無定期俾錢家人? 你期望將來子女會俾返你嗎? 呢個議題我自己也很久前已有答案，呢兩個問題的重點係第二條，就是大部份人都係期望將來子女會俾家用自己，從背後含意看，即使大部份人不認為自己有能力搵到足夠退休金以確保自己將來生活無憂。又假若將來佢地子女亦無能力供養佢地咁會如何? 途徑相信只有一個，就是政府，那麼在人口老化中的香港，政府有足夠資源投放係老人服務，或你認為政府/公立醫院有能力幫到我們嗎? 不知你心裏答案是甚麼，不過我個人好肯定的說，政府幫唔到我地，將來我地仔女都好大機會幫唔到我地，因為佢地係已經過左黃金三十年的香港出世，係物價同樓價都飛升，但人工跟唔上的地方下，佢地要有足夠金錢去養自己及成家立室，我都覺得佢地會比我地更困難，所以要令你可退休安心，則必需靠我地係工作年期賺到足夠既金錢。若由25歲開始工作，60歲退休，90歲死，則你要用35年時間賺到65年的生活費，當中仲要包含成家立室，養妻活兒，置業安居，醫療雜費，人生享受等等，我自己計過退休生活費確實需要過千萬，我同不少友人講過我們現在需要過千萬才可以退休，差不多個個都眼突突，好似好難相信，但確實將來必然如此，只係大家都無去認真計過條數，有機會我都係度同大家計一計。某日，係某商場見到某名牌店減價賣袋，一個唔係好靚既袋居然要賣成千幾二千蚊! 但隔離個女仔話，嘩! 好抵呀! 聽後簡直覺得恐怖，我相信現今很多人也是先洗未來錢，洗的是他們自己未來的退休金。

美國救市方案遭否決 美市跌777

今日係10月1號國慶，所以得閒先打一打關係我對呢方面既睇法。國會否決呢個議案係意料之外，美市即刻暴跌777點，全球應進入恐慌，到第二日港股開市前，任總等人出黎出口術，又警告人唔好濫用沽空等等，即日港交所出五招。美股跌最大單日跌幅，港股最少應裂口低開1000點，我仲諗今日係好入貨位，點知...! 竟然開市之後逐步收窄~最後仲倒升百幾點!? 我對呢個市感到有些不安，港股應跌不跌，想一想昨晚美股暴跌咁多，而且係限制沽空後發生的，即是大家用實貨逐格逐格拋出黎質低個市，都可以跌到咁!? 港股昨日應係沽家繼續發圍狂沽贏錢，莫非就真的因任總出口術就平哂淡倉? 仲入埋貨? 美元呢一兩個月轉強，但可留意到港元竟比美元更強，顯示資金流入本港，我相信資金入黎只為一個目的~沽貨賺錢，因全球各主要市場已禁示沽空，香港仍係一個福地俾你玩沽空~玩倒升，引你班散戶入埋貨(我仍覺得香港散戶仲有好多購買力)，大戶又買下貨，升到你去一個高位，之後儲黎沽空，一次過等爆多個大消息，再沽沽沽!!! 當然這也是我估估估!!! haha!! 我覺得市場係需要有沽空制度先可以建全，沽空需可質低d貨，但佢平倉時也可緩和散戶沽貨情緒，某程度上有穩定市場既作用，當然一定唔可以俾人濫用呢個制度啦~