中原指數98.15

中原指數已升至98.15了！不過這次數字並未反映日核災危機，所以下週應該會下跌吧！看來要挑戰100點還需一點的時間，日本的核災到現時都仲未解決到，輻射日日放出黎，都幾得人驚，希望可以盡快搞掂吧！

597 華潤微電子全年業績扭虧為營

今日是華潤微電子597公佈業績的大日子，和預期一樣全年業績扭虧為營(這是肯定的吧！)，還宣佈了派發末期息，這點就半驚喜，上次派息已經是04年了，派息是一個暗示，代表公司相信未來環境應該較以往好，所以可以派息回贈給股東們。這亦可能代表著公司財政穩健!?(未睇清楚)。又可能是換了管理層，想打造返微電子的正面形象，吸引股東買入而做的手段!?　無論如何，有派息都是好吧，今次每股派0.5仙，以今日收市價計，息率只有1.16%，多少無妨，未詳細看份report，看後一定跟大家分享！午市升幅擴大，升接近5%。

近日還有愛股之一中國自動化569公佈業績，當然也是很對辦吧！不過也是未看，哈哈~

這幾日升勢，不知是中途反彈浪，還是已經反映完這一次調整浪的尾聲，但已經三月，調整了多個月，要結束也可能是差不多，於這次跌浪因未到價而未能及時買貨，令我想起之前看書前人分享的，買貨時不要為了平幾格已買不到，因為這樣會錯過往後的大升浪！投資真係有排學！

暴跌下的日股

日本地震後，星期一及二兩日內日股合共跌了1600點！這兩日日股的暴跌直情係股災feel！嚇都嚇死人，D股閒閒地都跌廿幾%，香港昨日亦一度遭恐慌性拋售，昨日因工作關係，朝早都不知道跌得這麼厲害，到下午知道時便拿拿聲排隊買貨，今次暴跌對好多股都無基本因素影響，絕對係入貨好時機，是次決定買入進可攻退可守的嘉華國際173，可惜排到收市都入不到！睇一睇個盤，就會發現買貨的人多於賣貨的人，今日嘉華收市比昨日收市價已升5%，微電子升過6%，最慘情係中國全通，昨日被人質低落去，今日無力上攻。日本作為亞洲區經濟大國，這次的危機令到資金逃走得極快，資金流出亞洲區，昨日港匯亦去到7.796水平，已經非常接近中位數了！資金一日不回來，港股都無運行。

希望日本今次盡快渡過難關！

中原指數96.44

上週中原指數繼續升，去到96.44，多間銀行上調H按利息，想買樓的業主要計過條數，相信會有一段時間要消化一下，但要升的始終都會升，阻也阻不住，放盤量少，有需求的始終都要買，這陣子我也思考倘若利潤大到有足夠吸引力時，是否放了層樓，但放自住樓轉租，風險極大，成本不輕，所以除非真是利潤足夠大，否則都是一動不如一靜。

臨時撥款被否決 如果我係政府...

臨時撥款第一次被否決，香港政府史上第一次，看到陳家強聽後一臉噩然、迷茫，相信事前無人想得到，今次簡單的一次臨時撥款想不到殺大家一個回馬槍！若果未能於四月前通過，將會影響到非常多的基層人士，雖然好大機會一定會在四月前搞好，不過我覺得今次是一個好機會話俾市民聽，若然不顧及民眾利益而反對，可能做成的後果會如何。既然你班泛民玩大佢，如果我係政府，一於同你再玩大佢，既然你否決我，我就即管停所有任何開支運作兩星期，看看你們仲惡得出咩樣，到時泛民的呢次舉動，將會反被全城圍攻！不過講就咁講，最終都會無事啦，我亦唔希望玩咁大，但這亦是一次機會讓一班經常想挑起戰爭的人們看清現象。

又多一間半導體公司有好業績

繼ASM太平洋業績大改善後，今日先進半導體也公佈業績，當然也是扭虧為盈吧！期待著華潤微電子597的業績公佈。早前華潤微電子也打入中國半導體十大企業，以下是其資料。華潤矽科是剛以第十名入到十大IC企業，而華潤微電子則以第三名成為集成電路與分立器件制造企業，相信這亦是對華潤微電子的規模一個肯定吧！

無錫新區4家IC企業入圍中國半導體十大企業
3月4日從2011年中國半導體市場年會上獲悉，無錫市華潤矽科、海力士、華潤微電子、英飛淩等四家企業成功入圍中國半導體十大企業。


據介紹，無錫華潤矽科微電子有限公司以第十名入圍2010年度中國半導體十大集成電路設計企業，無錫海力士-恒億半導體有限公司和華潤微電子（控股）有限公司分別以第一名和第三名入圍2010年度中國半導體十大集成電路與分立器件制造企業，而英飛淩科技（無錫）有限公司以第十名入圍2010年度中國半導體十大封裝測試企業。

2011年3月投資組合

近排好懶，好多野都唔想做，有幾日想更新個blog但最後都放棄了，今日都決定來更新一下，先來匯報下現時的持倉組合:
173 嘉華國際 20%
597 華潤微電子 41%
633 中國全通 31%
現金 8%

恆指已由低位回升至23711點，已臨近下降軌的上線，不太感到會出現真正升浪，我都係估估下，最多升到24000點企一企就會調頭落返去繼續呢次未完的調整。睇返股仔，也覺得調整將完，估計嘉華國際再落一落試返條上升軌，華潤微電子亦唔似完成調整，反之中國全通近日有好轉跡象，還看黎緊一兩週能否緊守崗位，守住個價位，今年以來的操作不太好，第一季快將完結，趁著未完的調整浪，好好整裝待發！

懦夫曾俊華! 悲哀的香港命運!

呢篇比較長，開頭講我的睇法，最後一兩段講我建議點用呢6000蚊，若你不想看太多，可以skip左前面只睇最後，感謝你的耐性！

香港的政治文化越來越令我看不過眼！曾俊華居然公佈預算案後的一週後，宣佈除消強積金注資改為18歲以上人士派錢！真係好諷刺！曾俊華究竟有無立場！佢的責任係為左香港的未來財政狀況作考慮計劃，而非討好議員討好市民，一次性派錢等同於拋錢落咸水海，對貧窮階段完全無幫助，更令政府將來施政越來越困難，試過一次，D人下次有咩唔鐘意就出黎話要呢樣要果樣，好似無家教的小朋友一樣，然後父母縱容佢的惡行，不加以管教，最後小朋友大過左會變成怎樣，大家非常清楚吧！

李卓仁講得好，雖然我同佢大部份時間理念極為不一致，派一次錢有咩用，你地買到樓咩?可以解決貧富懸殊嗎?香港現在存在的是制度性問題，你派一次錢只係俾條魚佢食。事實上，大部份人拿到錢後會做甚麼?買衫、買褲、買遊戲機、買iphone、買ipad、去旅行，總之就係洗左佢，你睇今晚新聞訪問咁多人，佢地全部做的野都係買野，點解會咁！因為呢6000蚊對佢地黎講根本唔係必要！無左呢6000蚊佢地唔會死，俾多舊錢佢地，只係俾佢地去消費去happy！只有真正貧窮的人才有需要用呢6000蚊！先會好好珍惜使用。在我的角度去睇，曾俊華係絕對浪費左一個機會成本，本應呢舊錢可以係用黎注資強積金解決40年後香港的財政問題，又或可以用呢舊錢實行真正幫助貧窮階層的政策，點解佢要用咁大舊錢，去派俾無需要的人！香港人口老化已經不能逆轉，將來要一人供四個，交稅都交死你！未來呢條路越黎越難行，財爺本來注資強積金是表示佢有為未來財政狀況付出及計劃，但現在佢竟輕易放棄自己的理念進行妥協，只著眼短線，我不知佢係咪想保住自己份工，定係有咩原因，但他現在的這個決定等同於對香港的未來不負責任！若佢能立場堅定，我唔相信佢唔可以說服建制派支持投票通過！

現在的香港政府越來越弱勢，自從2003年後我已經很擔心香港的政治環境，實在有太多議員打著扶助基層旗號爭取選票，在香港大搞福利社會，大搞共產主義！最遺憾的是，市民往往會支持佢地的理念，但卻忽略未來的社會發展問題，今次曾俊華的處理手法，我相信已經令香港政府出現嚴重的管治問題！我越來越擔心香港40年後的情況！拜托各位議員千萬不要再搞甚麼害死香港的福利主義！

托財爺所得的這6000蚊，對我來說只是一筆橫財，我本身是不應有的，本打算繼續作投資退休之用，但突然有一刻在想，還可以怎樣使用這畢金錢?我想到可以奉獻給教會作重建，平常會返教會的人若有600人，每人奉獻6000，就有360萬！現在將進行內部裝修要1800萬，這360萬就已經足夠俾兩成資金，若人人也這樣奉獻的話，我反而還要轉頭來多謝財爺一聲！

若然你不是教徒，不會奉獻給教會，我也呼籲你不要拿來消費或只部份消費，然後將這6000元或一部份都拿去捐給有需要及能真正幫助弱勢社群的慈善機構！這樣的話，我相信能透過我地的手去代財爺好好地運用大家的金錢去幫助弱勢社群！財爺需不負責任地將金錢交給大家就算，但我認為各位有選擇的權利去決定如何使用這畢錢，沒有人會知你如何使用，各位憑自己的良心而行吧！(先此聲明，我無話你唔捐就係無良心，切必曲解^^)