769 中國稀土

昨日停牌前中國稀土769收4.39, 今日都復牌喇, 折讓約一成配股, 睇下D報導, 居然有傳話巴菲特會入股! 真係傳得恐怖, 打死我都唔相信巴菲特會入呢D股, 若果唔係老公公當時搵唔到另一隻港股都係做稀土生意, 我都唔會揀中國稀土黎落注, 不過香港真係無咩邊隻股係做稀土生意, 雖然中國稀土係做下游業務, 但假若成本可轉介俾客戶, 佢都仲有利可圖, 可以係上半年業績睇得到, 不過當時係份業績都有講有D公司未能接受到稀土價格大升, 對加價未係好接受, 不過大形勢都係稀土會加價, 營業額點都會大升架喇. 講返今日隻769的表現先, 朝早跌過落4.02之後彈返上去, 最高仲去過4.57! 不過尾市都係無咩力, 收左4.22跌左3.87%, 表現尚算可以, 通常每一個熱潮都會炒一段時間約半年, 而家只係炒左兩個月到, 老公公會繼續持營保泰!