對未來幾年的看法

恆指今日收係23200點樓上, 係兩年幾以來第一次, 呢次跳升咁快, 主要原因係市場認為美國將會推出量化寬鬆2, 係預期大印銀紙之下, 資金周圍走, 於是走入黎香港買股買樓, 推高資產價格, 黎緊究竟會一支箭升上去, 定係會有一個調整之後先上去呢? 事後大家先會知, 不過老公公傾向認為會先有一個調整, 但會係急且快的調整, 跌一二千點就收貨, 估計可能係11月聯儲局議息後就會出現, 我認為的調整原因有兩種可能, 第一係預期落實, 查實美國經濟差先要救市, 呢排美國D 數據出得靚仔, 但竟然股市跌! 好消息當壞消息炒, 當聯儲局真係落實量寬時, 預期落實左, 市場焦點就會轉向美國經濟仍差或是次量寬手段無用! 總之有唔同解釋啦! 另一個原因可能係, 聯儲局決定唔推量寬! 嘩~~~明明炒緊你推出而家唔推喎! 呢個消息同市場遺背, 仲唔即刻沽貨離場睇睇先? 不過唔埋邊個原因, 當沽夠貨之後, 市場自然會搵到另一個解說, 之後繼續吹漲個泡啦! 港股運行左上落市差唔多成年, 好多基金都唔係賺太多, 我相信佢地都會製造一次跌市等佢地可以有最後一吸!



好! 唔理佢十一月量唔量寬, 總之美國繼續開水喉走唔甩, 咁講講未來幾年應該會點先! 老公公的估計係繼續低息, 但通漲怕怕! 美國而家絕對係無條件加息, 佢唔會一手將仲未復原的經濟推返死, 所以只會繼續低息運行, 我相信仲有一段好長的時間都係咁低, 估計2012年前唔會有機會加息, 除左經濟未真正好之外, 另一個原因係美國樓市問題, 樓市下跌而引爆次按係今次的原頭, 而家樓市都仲係死水咁樣, 斷供的繼續斷供, 若有留意新聞, 美國定唔知邊個洲, 每7個按揭就有一個斷供, 美國樓市問題多多, 前排又禁示贖樓等等, 總之有排搞! 如果我無搞錯, 美國按揭利率並唔係睇而家講既0-0.25%, 而係睇國債三十年息率, 大家若又有留意債市, 近期除左股市升, 債亦都一樣升! 兩者都有資金擁入去, 債息而家得咁少, 都要走入去買! 是但有一邊走錯市, 我傾向相信債市走錯邊! 將來呢個要爆的話, 可大可小! 資金走入債市, 推低左三十年息率, 無形中幫忙供樓人市減輕負擔, 你話樓市未有起色, 美國係咪咁巴閉會加息而引致息率上升先! 我就唔信佢咁有guts! 亦正因為咁, 美國而家處於兩難局面! 因為資金推入債市係佢救市的後遺症, 而家企虎難下呀! 唔知點收科! 所以我相信美國有好一段時間加唔到息! 唔係唔想加, 但條件唔容許! 債市假若真爆會好大獲, 美國將會更難去用債市集資, 甚至係影響其他國家! 到時每個國家都會好麻煩!



另外, 有D人話小心息率上升, 低息情況係罕見, 又話利息會好快上升, 若升到5% 息率就好多人供唔到樓等等, 我就同大家計計, 連埋11月同12月, 今年仲有兩次議息, 2011年將有8次議息, 2012年未出, 我當都係8次, 即係總共有18次, 用P計假若真係要升返實質供樓利率5%, 即要比而家升3%, 當聯儲局每次加0.25% (唔係咁勁可以一次加0.5%卦!), 即係總共要加12次, 唔好忘記就算美國加息, 香港頭幾次都可能唔跟, 咁我當2次唔跟, total 14次議息先至加到5%! 咁即係如果要實現呢條數, 就要由下年第二季左右就要開始每次會議都加息喇喎! 老公公就覺得今時既環境, 根本就無可能可以咁快加! 所以各位放心! 低息一來會持續, 就算加, 2012年都無可能加到去5%!



基於我認為低息會持續, 老公公最怕係通漲輸入呀!皆因我地利率要跟美國, 但實際上我地好多貿易同埋食品或其他野都係黎自中國, 當美元跌, 而人民幣轉升值, 香港就要越黎越貴去買大陸貨! 但我地又缺乏利率工具去控制將來可能出現的惡性通漲, 但工資上升幅度有限, 我相信通漲會遠遠拋離工資上升, 所以老公公覺得香港將來會出現一個好矛盾好難捱的階段! 各位要對將來所可能面對的問題作好準備!

以上純粹老公公個人睇法, 唔知岩定錯, 各位當睇下就好喇, 信則有, 不信則無也!