法國罷工

今日恆早曾跌穿23000點水平, 最後收返23096點, 朝早見佢跌到22900水平, 全通跌穿2.2, 心諗今次掂喇, 調整繼續的話可以平價D入到好貨, 之後做野都睇唔到市, 返到家望一望大市就跌, 但係係我張list的股票竟然得隻微電子係跌! 全通最後倒升3.49%, 稀土, 自動化, 恆安都升! 好古怪既現象, 唔知係咪同隻AIA有關, 港匯越來越強, 資金無走! 各位好好準備彈藥部處入市喇!

近日最令我關心的新聞並唔係前排的施政報告樓市政策, 又或某某地方的災害, 而係法國大罷工, 唔好以為呢件事距離我地好遠, 查實同我地有好大關係! 亦係老公公認為大家要盡早為自己退休做準備, 及早學習投資, 提升個人財務智商!

事緣法國政府打算將退休年齡推遲兩年, 全國人民當然強烈反對啦! 仲罷工遊行等等, 皆因呢個延遲退休年齡將會令到佢地更遲拿到退休金, 但其實點解政府要咁做呢? 原因係人口老化! 同美國一樣, 太多人係戰後出生, 老人越來越多, 但係出生率低, 導致勞動人口減少, 造成的現象就係無足夠稅收去支持國家的福利醫療政策, 因此, 政府若延後兩年退休期, 將可減慢國民提取退休金的時間, 同時間亦可抽多你兩年稅, 其實只係一個拖延的政策, 並無解決真正問題的核心, 而事實上, 係多年前決定的呢類政策, 亦已經可預視政府支出將大增, 若不想延遲退休, 政府有咩方法解決呢個問題? 我相信加稅及移民政策係其中的辦法, 法國失業問題嚴重尤其青少年, 早一兩年都見到好多呢方面的衝突發生, 加稅只會增加年青勞動階層的負擔, 扼殺佢地的消費能力因而破壞經濟的良好循環, 移民政策則涉及種族歧視, 及外來移民和本國勞工的競爭同不滿, 未必個個地方行得通. 退休保障呢個大問題已經逐漸係大些大國發生, 若處理不當後果嚴重!

為何我說這和我們有好大關係呢? 香港亦進行人口老化階段, 預計2031年, 四份之一人口將是老人, 到時個人供養數字將較現在大幅上升, 同法國及美國將預到的問題一樣, 老公公最怕的是政府被逼加稅! 香港好在係稅制建全及對普遍人民都比不太大負擔, 皆因香港並非福利社會, 若然要加稅, 相信對年青一代的人會有較大負擔, 另外, 香港的移民政策引入專才亦可改善出生率及勞動力問題, 相信能有效改人口老化問題, 但同時繼續引入專才, 某程度上削弱了本港的年青人就業情況, 其實要怪係怪而家好多年青人不求上進, 沒有好好讀書計劃將來, 父母亦沒有管教, 物質主義令佢地不知世間為何物! (越講越遠@@!) 雖然政府已為將來老化問題著手處理, 例如移民政策, 強積金, 未來的強醫金, 但是否成功仍為未知之數, 假若政策失敗, 未來的我們就要面對無可避免的加稅及延遲退休! 而且, 香港仲有一班為爭取選票而想將香港變成福利社會的政客! 好似之前佢地係咁逼政府將生果金由700加到1000蚊, 其實我覺得係唔應該! 生果金係政府最老人以前所做的貢獻的一個回饋, 但政府咁樣大幅加法其實將問題推給將來的政府! 20年後有更多的老人, 所需付出的金額將會大大提高! (又講得太遠) 總而言之, 面對人口老化, 政府有可能將茅頭指向勞動人口, 我地應該及早為自己提供一個安全網, 即使將來真的要加稅或削減福利等, 我地亦有能力維持自己的退休生活而不受影響!