597 華潤微電子 (鐵底)

上回講到有個原因係我認為而家買入597無死, 今日有時間同大家分享下.

第一, 話說隻597係2009年中行業最艱難時曾想私有化, 但最終遭小股東否決, 當時集團出價0.3私有化 (俾我都否決啦! 咁低! 你睇下個圖就知, 差唔多所有人都係蟹貨, 點會私有化成功!), 咁私有化失敗左, 集團只可宣佈供股集資繼續做盤生意啦, 點知過左半年到2010年喇, 竟然經濟復甦咁快, 生意仲做多左, 結果2010年半年業績做出集團歷年最好的一份報告! 之後高層亦講出唔會再重提私有化, 因為已經渡過左難關, 比之前更好, 無需要私有化. 係呢件事講出左咩野呢, 就係0.3係一個鐵底! 集團想用0.3私有化, 因佢認為股價太殘, 點都值0.3, 而且當時集團仲係低潮, 但而家集團生意做得好好多亦脫離行業低潮, 即係話華潤微電子既價值比起0.3要高! 由私有化失敗的價及業績有改善可看出買入原因之一.

第二, 華潤集團母公司有心想谷起華潤微電子! 原因係私有化失敗之後, 係今年8月, 597成個管理層大執位! 而且派入的人全部都係華潤集團老臣子! 都係有相當經驗之人! 主席王國平, 首席執行官鄧茂松, 非執董杜文民, 石善博, 魏斌, 張海鵬. 而之前的朱金坤, 蔣偉, 李福祚, 黎汝雄全部辭職! 空降的人我唔多講, 總之都係之前成功培植華潤燃氣1193, 華潤創業291, 華潤電子836, 華潤置地1109的管理層! 華潤有6間在港上市的企業, 已經有三間係晉升為藍籌股, 可見其班底實力雄厚! 俾篇野大家睇, 只抄少少出黎

http://paper.wenweipo.com/2010/07/19/FI1007190008.htm
宋林指出，雖然華潤微電子去年私有化失敗，但這個純粹是市場行為，目的都是為了發展，然而隨著微電子市場回升，現在已無此計劃，並強調一定不會放棄這個板塊。「華潤作為央企，是應該將更多資源投放在關乎國家未來競爭力的行業上，微電子是一個典型的高技術行業，國家未來參與全球競爭，是否有創新能力非常重要，然而微電子行業的好與壞，正可代表著國家的科技創新，央企要對國家有承擔，就應該努力去做，而且要做好，將來亦會與其他海外公司合作。」

宋林係華潤集團的董事長, 佢亦講明一定不會放棄這個板塊! 而且亦說出半導體在中國未來高科技發展上的重要性, 由8月的大執位已經可看到華潤母公司正計劃谷起華潤微電子, 誓要做大佢!

第三, 注資概念, 講到明概念就緊係唔知幾時啦! 母公司仲有資產權益係8英吋晶圓生產線, 講明係適當時期會注入華潤微電子, 係幾時無人知, 不過相信係呢條生產線full哂時, 生意額穩定時就會實行注資了! 我估計一兩年內應該可以做到, 呢次注資隨時仲大過而家597市值! 若真正實行, 股價升一倍無走雞!

綜合以上三項因素, 呢隻597轉機股+注資股概念, 係而家現價呢D位當然仲入得過啦! 而且細細隻, 好岩食!