預測

期待已久既反彈市會唔會就黎開始呢? 6蚊買入化肥之後就係度等待呢一個反彈市，上星期五同埋昨晚美股升，再加上九哥當選，今日恆指大升1300點!!! 上返22000樓上，我期待既反彈市係彈返上25000-28000，之後係呢個時候就放左化肥，反彈市好吸引，令到好多人想買上落區間，但其實同我當年玩外匯一樣，當你有d斬獲而繼續玩既時候，你就會發現上左當，因為區間上落好容易哄你係你以為係支持位既地方入貨，但係偏偏係呢個時候你就中招，因為你唔發現原來個區間其實係向下移，咁樣你以為係支持位既地方買貨，而個區間就向下移，咁你所買既貨咪即係變左蟹貨區，你所一直相信既支持位就變成你既阻力位！於是乎，你又只可以慨嘆一下無情既人生！所以放左化肥之後都係先撤離股市，然後默默揀股，等待熊二上落市過去之後既熊三來臨，係果個時候就掃我既心水股。呢個應該係我今年玩股入市策略。不過我係天生有些少賭徒既特質，所以唔排除有一日我覺得個反彈市真係好吸引，又可能少少地參與~haha!!!

次按危機要撥備既都撥喇，要出業績既又差唔多要出，而且可能市場好快就會發現次按影響唔係想像中咁大，不過仲有既隱憂可能就係 A股，美國樓市，美匯同黃金。A股呢幾日不斷咁跌，即使美市升，港市升，A股跌勢未止，拖住港股後腳，A股股民未經歷過股災，佢地既行為會令到將來A股暴跌時更加過度跌深，因此唔好忽略A股暴跌之後探黎既影響力，A股仲未狂瀉之時，熊市係唔會過去。次按所影響既仲有樓市，假若美國政府唔能夠成功禁住樓市，呢個會直接影響美國人民信心。大家仲要小心既係美匯，美元跌左咁耐，我既感覺令我覺得要蘊釀緊一個較大既反彈，金價呢幾日亦都先行回落，美元止跌回升後雖然可能只係一雯那，不過都唔好睇少~總知就係變數多~大家記住小心為上!!!